Vaccin cunter corona - Glisch verda per il product da Johnson & Johnson - Novitads

Vaccin cunter corona Glisch verda per il product da Johnson & Johnson

Autur: SDA / Alexi Baselgia

L’Uniun europeica ha bainprest a disposiziun in quart vaccin cunter corona. L’Agentura europeica per medischina EMA cusseglia da lubir provisoricamain il vaccin da Johnson & Johnson.

Il vaccin sviluppà da l'interpresa Janssen ston ins mo squittar ina giada.
Per conservar il vaccin tanscha ina temperatura da frestgera.
Il vaccin gida tenor l'Agentura europeica per medicaments EMA en var dus terzs dals cas.
Tar grevs cas da Covid-19 mussan ils studis tenor la EMA ina protecziun da passa 85 pertschient. Quai vala era per glieud pli veglia.
Il vaccin duai era avair effect cunter variantas dal coronavirus.

La decisiun finala giascha en ils mauns da la Cumissiun da l’UE, quella vala dentant mo sco chaussa formala. L’Uniun europeica quinta da survegnir las emprimas furniziuns il mais che vegn.

Svizra lavura il mument cun dus vaccins

Suenter Pfizer/Biontech, Moderna ed AstraZeneca fiss il vaccin da Johnson & Johnson il quart che vegn lubì en l'UE. Ils Americans han lubì il product da Johnson & Johnson avant var duas emnas. En Svizra èn per entant mo vaccins da Pfizer/Biontech e Moderna lubids ed en diever.