- Almain duas basas militaras en l'Irac, nua che truppas da schuldads americans èn staziunads, èn vegnidas attatgadas cun rachetas.
- Las gardas da la revoluziun iranaisa han confermà d'avair sajettà las rachetas.
- Pertutgads èn la basa militara ad Al Asad ed ina basa en il nord da la citad Erbil.
Discurs duain quietar situaziun
Il minister da l'exteriur tudestg, Heiko Maas ha condemnà las attatgas da l'Iran sin las basas militaras americanas en l'Irac. El supplitgescha l'Iran da laschar la detta dad ulteriuras acziuns che pudessan manar ad in'escalaziun da la situaziun. «Nus essan dapi dis en contact cun tuttas varts per pudair quietar la situaziun. Tuts èn supplitgads dad agir en questa situaziun a moda prudenta e calma», ha ditg Maas.
Ils Emirats Arabs Unids han medemamain supplitgà da deescalar la situaziun en la regiun. Quai saja prudent e necessari, ha scrit il minister da l'exteriur Anwar Gargasch sin Twitter. I dovria uss ina via politica per garantir la stabilitad.
Attatgas sin duas basas militaras americanas
L'Iran ha attatgà duas basas militaras en l'Irac, nua che schuldads americans eran staziunads. Quai ha il ministeri da defensiun american confermà. Passa in tozzel rachetas sajan detunadas sin las duas basas militaras ad Al-Assad ed Erbil. Las gardas da la revoluziun iranaisa han confermà d'avair sajettà ellas. La televisiun statala da l'Iran rapporta che radund 80 persunas sajan mortas tar l'attatga.
«Act da defensiun»
I sa tractia d'in act da vendetga suenter il mazzament dal general iranais Ghassem Soleimani. La regenza iranaisa ha numnà las attatgas cun rachetas in «act da defensiun legitim e commensurà». «Nus na vulain betg in'escalaziun u ina guerra, ma nus vegnin a sa defender cunter scadina agressiun» ha il minister da l'exteriur Dschawad Sarif scrit sin Twitter.
Medemamain sin Twitter ha il president american Donald Trump scrit che tut saja bun. Ins vegnia anc a sondar la situaziun. Ed el ha agiuntà: «Nus avain la meglra armada dal mund».
Schuldads dals alliads betg blessads
Sco la Bundeswehr da la Germania ha communitgà na sajan nagins schuldads tudestgs blessads ad Erbil en l'Irac dal nord. Plinavant na sajan er nagins Danais blessads. L'armada danaisa ha staziunà radund 130 schuldads ad Al-Assad. Er il militar norvegiais ha declerà ch'i na dettia ni blessads ni morts tar l'attatga ad Al-Assad. Ed er la Pologna fa a savair ch'els n'hajan nagins blessads.
La Spagna ha entant fatg a savair ch'i retirian ina part da ses schuldads a Kuwait. Ina gruppa sminuida restia dentant en l'Irak. La Frantscha na planisescha il mument betg da retrair lur radund 160 schuldads dal pajais.
RTR novitads 06:00