Siglir tar il cuntegn

Header

cuntegn

Virus da corona Dapli morts da corona che da SARS

En China è il dumber d'unfrendas dal virus da corona creschì sin 811, han rapportà las autoritads. Quai munta che dapli persunas èn uss mortas pervi dal virus da corona che da la pandemia da SARS avant 17 onns. Da quai temp avevi dà 774 morts.

La sonda sajan mortas 89 persunas pervi dal virus da corona. Quai sajan tantas persunas en in di sco fin uss anc mai. Il dumber d'infectads giascha tenor l'uffizi da sanadad chinais, NHC tar stgars 37'200. Ordaifer la China èn enconuschents 330 cas d'infecziun en radund 25 pajais. En Svizra na datti fin uss nagin cas confermà.

Vi dal virus da SARS eran s'infectads il 2002/2003 sin l'entir mund radund 8'000 persunas.

Dubis tar la populaziun chinaisa

L'augment dal dumber d'infecziuns e da morts chaschuna per temas tar blers Chinais, che turnan a partir da damaun puspè a la lavur, suenter che las vacanzas da Bumaun eran vegnidas prolungadas. En las medias socialas èn las autoritads vegnidas crititgadas ed i dat dubis davart las cifras che las autoritads publitgeschan.

Las vacanzas eran vegnidas prolungadas, per pudair franar la derasaziun dal virus, ch'ins ha chattà sco emprim a Wuhan. Pliras naziuns han entant laschà turnar lur burgais, per ch'i na stoppian betg restar en China. Er la Svizra ha laschà turnar ses burgais. Quels sa chattan il mument en Frantscha en quarantina.

RTR novitads 09:00

Dapli da Exteriuravrir la Landingpage

Nach links scrollen Nach rechts scrollen