Tenor Daniel Koch, il manader per malsognas transmissiblas tar l'Uffizi federal da sanadad BAG, èsi pussaivel ch'il nov virus da corona cumparia er en Svizra:
Quai rapporta SRF sin basas dal pli nov giudicat dal BAG en chaussa nov virus da corona.
Actualmain naginas mesiras spezialas en Svizra
Mesiras tar l'arrivada en la Svizra na datti però betg. Las mesiras, ch’ins prendia, stoppian basar sin fatgs, argumentescha Daniel Koch dal BAG. Blers fatgs per decider da prender mesiras pli rigurusas manchian dentant actualmain:
Tgi che returnia da la China e sa na sa sentia betg bain duai ir tar il medi e quel possia lura infurmar il medi chantunal. Il labor a l'ospital universitar a Genevra, che fa ils tests sin il virus da corona, possia analisar exactamain, sch'igl sa tractia propi da quel tip da virus.
La situaziun vegnia dentant analisada cuntinuadamain da nov, di il BAG.
Plirs pajais vulan clamar enavos lur burgais
La Frantscha, ils Stadis Unids e la Russia planiseschian da far vegnir a chasa burgaisas e burgais ch'èn il mument a Wuhan en la China, rapporta l'agentura da novitads Reuters.
Il concern d'autos franzos PSA ha communitgà ch'el veglia far vegnir enavos en Frantscha ses emploiads e lur famiglias. Pertutgadas sajan 38 persunas.
Tenor la gasetta americana "Wall Street Journal" vulan era ils Stadis Unids far turnar a chasa lur burgaisas e burgais. Il medem vala tenor l'agentura da novitads Novosti per la Russia.
En China èn isoladas 18 citads
Per tegnair en frain il virus ha il ministeri da turissem chinais scumandà a partir dal glindesdi tut ils viadis en gruppa. Quai rapportian differentas medias chinaisas, scriva SRF. Las autoritads han er gia ordinà ch’il haja da dar sin tut la rait dal traffic public staziuns per mesirar la fevra. Persunas malsaunas hajan da vegnir transportadas en l’ospital. Actualmain sajan isoladas 18 citads chinaisas.
En China èn enconuschent radund 1’400 cas confermads da la malsogna da pulmun, 41 persunas sajan mortas dad ella. Singuls cas èn er vegnids annunziads dals Stadis Unids, da la Tailanda, dal Giapun ed ultimamain er da la Frantscha e l’Australia.
RTR 18:00+