Las autoritads emprovan dad evitar ch'il virus sa derasa vinavant. Fin uss han las autoritads isoladas 18 citads dal rest dal mund. En diesch citads hajan ins serrà il traffic public. Attracziuns turisticas sco parts dal Grond mir chinais èn vegnidas serradas. Tenor l'Autoritad naziunala da sanadad stoppian vegnir endrizzadas en l'entir spazi public staziuns per mesirar la temperatura dal corp dals viagiaturs. Persunas cun suspect d'ina infecziun stoppian ir immediat en in'ospital.
Stadi d'urgenza a Hongkong
Perquai ch'il nov virus da Corona sa derasa ha Hongkong decretà il stadi d'urgenza ed uschia il pli aut stadi d'avertiment. Tenor la schefa da regenza Carrie Lam na dettia fin uss naginas grevas infecziuns. Els veglian dentant prender serius la chaussa e sperian d'esser in pass avant a l'epidemia. Tut ils sgols e las colliaziuns da tren ord la citad Wuhan, nua ch'il virus è rut or, vegnian bloccads il mument.
Virus arriva en Europa
Ils cas da contaminaziun cun il virus da corona creschan. Il Ministeri da sanadad franzos ha communitgà che trais persunas sajan s'infectadas cun la malsogna dal pulmun/lom. Tut ils trais pazients sajan stads curt avant en China. Pel mument sajan els en quarantina. Er en Australia han las autoritads confermà in cas.
Anc nagina epidemia globala
L'Organisaziun mundiala da la sanadad WHO discurra en connex cun il virus da corona d'in «cas d'urgenza chinais». Per discurrer d'ina epidemia internaziunala saja pel mument anc memia baud. Els quintan dentant ch'il dumber dad infectads crescha vinavant.
RTR novitads 06:00+
