Siglir tar il cuntegn

Header

cuntegn

Virus da Corona Xi haja prendì mesiras per franar la derasaziun dal virus

xi jinping tar in pled
Legenda: Il president chinais Xi Jinping haja prendì mesiras per cumbatter la derasaziun dal virus da corona gia il schaner. Quai tenor medias statalas. Keystone

Il president chinais Xi Jinping era para infurmà ad uras davart ils privels potenzials dal nov virus da Corona. Xi haja gia dapi l’entschatta da schaner dà instrucziuns per cumbatter il virus, rapportan medias statalas. Vers la giunta dal biro politic haja el infurmà il favrer d'avair instradà las primas mesiras per cumbatter il virus gia ils 7 da schaner. Plinavant haja el introducì controllas da viadi severas - surtut per la provinza Hubei ch'è pertutgada il pli fitg.

Cun questa publicaziun ussa pari d'esser cler che la regenza centrala era intretschada en il cumbat dal virus gia naven da l'entschatta. Automaticamain èsi però era cler che la regenza locala n'ha betg decidì persula - la regenza locala ch'è vegnida crititgada fermamain d'esser stada passiva. Ils ultims dis han plirs politichers da la regenza locala demissiunà.

Entant èn infectadas en la China radund 68'500 persunas cun il virus da corona. Tenor la cumissiun da sanadad chinaisa èn ulteriuras 142 persunas mortas da las consequenzas dal virus. En tut munta quai che 1665 persunas èn mortas fin ussa en la China dal virus.

RTR novitads 14:00+

SDA / DPA / Ursin Cadisch

Artitgels legì il pli savens

Nach links scrollen Nach rechts scrollen