En Frantscha è morta l’emprima persuna en Europa pervi dal virus da corona. In turist chinais da 80 onns saja mort en ina clinica a Paris . Quai han communitgà pliras agenturas da novitads, sa referind sin la ministra da sanadad franzosa Agnes Buzyn. En tut èn fin ussa vegnids annunziads trais mortoris pervi dal virus da corona dador la China: in a Hongkong, in en il Giapun ed in sin las Filippinas.
En China èn morts almain 1'523 persunas
En l'entira China èn tenor las autoritads da sanadad mortas almain 1'523 persunas. In augment da 143 cas dapi il venderdi. Il dumber dals infectads saja creschì per passa 2'600 sin prest 66'500. Il pli ferm è la provinza da Hubei pertutgada. En questa regiun èn vegnids annunziads 2'420 novs cas, 139 persunas èn mortas là. Il dumber d'infectads enturn la citad da Wuhan munta a 54'406.
Il virus sa derasa
Entant ha il virus era cuntanschì l'Africa. L'Egipta ha annunzià in emprim cas. Pertutgà saja ina persuna da l'exteriur. La persuna vegnia tractada en ina staziun d'isolaziun. Ils tests tar las persunas da contact sajan negativs.
En la nav da cruschera ch'è en quarantina en il port da la citad giapunaisa Yokohama crescha il dumber da passaschiers infectads. Dapi l'entschatta favrer èn s'infectads 280 dals passa 3600 passaschiers.
Era medis e tgirunzas èn pertutgads
En China èn er adina dapli collavuraturas e collavuraturs dal servetsch da sanadad pertutgads dal virus da corona. Tenor las autoritads èn fin ussa passa 1'700 medis e tgirunzas infectadas cun il virus, sis dad els èn morts.
Ord l'archiv
RTR novitads 06:00
