- L'emprima giada è ina persuna morta ordaifer la China pervi dal virus da corona – quai sin las Filippinas.
- L'um era viagià ensemen cun sia dunna or da la citad chinaisa Wuhan sin las Filippinas. Là èn els vegnids malsauns en consequenza dal virus.
- Il dumber da las infecziuns sin l'entir mund munta actualmain a passa 14'400.
Quest pazient è arrivà da l'epicenter da questa epidemia.
Tenor indicaziuns da l'Organisaziun mundiala da sanadad WHO sa tracti da las duas sulettas infecziuns confermadas sin las Filippinas. «Quai è l'emprim mortori annunzià ordaifer la China», ha ditg il represchentant da la WHO Rabindra Abeyasinghe a Manila. Da resguardar saja dentant, che l'um n'haja betg piglià si il virus sin las Filippinas. «Quest pazient è arrivà da l'epicenter da questa epidemia», manegia Abeyasinghe.
En la China sa derasa il virus vinavant
Il dumber da mortoris e da persunas infectadas è puspè creschì en la China. En tut discurran las autoritads chinaisas uss da 304 mortoris, tuts en la provinza Hubei ch'è cunzunt pertutgada.
Novs cas d'infecziuns hai dà 2'590, sco la Cumissiun da sanadad naziunala da la China communitgescha. Uschia s'avischina il dumber total da persunas infectadas a 15'000. Ordaifer la China èn fin uss enconuschents passa 20 pajais ch'han constatà infecziuns.
Nagin privel per la Svizra
Era sch'il virus da corona sa derasa rasant, na furman persunas chinaisas en Svizra nagin privel. Nagin saja infectà, ha ditg l'ambassadur chinais en Svizra, Geng Wenbing, en in'intervista cun la «NZZ am Sonntag».
L'ambassada chinaisa haja gì contact cun tut ils turists chinais, e cun persunas chinaisas che vivian en Svizra. Actualmain saja mo anc in pitschen dumber da turists da la China en Svizra.
RTR novitads 06:00
