La ruina dal chastè da Lichtenstein è ina da las pli marcantas ruinas en il chantun. Pervia da sia posiziun exponida cun in bel panorama sin la val è la ruina bain visibla ed ha uschia er ina impurtanza turistica. La ruina, che vegn era numnada «Katzenburg», cumpiglia ils rests d'ina tur, in palas (edifizi cun sala) ed in mir da tschinta. En la curt sa chatta ina cisterna. Tenor l'istoricher d'art Poeschel aveva la tur trais plauns ed il palas quatter plauns. L'access manava oriundamain sur ina passarella che pendeva libramain sur il precipizi da la paraid ost.
In chastè cun istorgia
Il chastè, ch'era la sedia dals signurs da Lichtenstein, è attestà per il 12. tschientaner. A la fin dal 13. tschientaner, suenter che la schlattaina da Lichtenstein era morta ora, èn ils signurs da Haldenstein daventads novs possessurs dal chastè.
L'onn 1474 è el anc registrà sco ruina. Enturn l'onn 1570 era el apparentamain gia ì en decadenza. Maletgs dals onns 1780, 1837 e 1916 laschan supponer, ch'il stabiliment oriundamain impressiunant sto esser ì en decadenza in pau a la giada.
