Uss èsi definitiv: Il suveran grischun va d'accord da renovar cumplettamain il bajetg istoric a Cuira, per realisar là la sedia per la nova Dretgira superiura. Bun 70% han ditg Gea al credit da 29,2 milliuns francs.
Credit da 29,2 milliuns francs
Resultat
La decisiun per il credit è stada in zic pli dispitaivla che quel da la refurma da la giustia sco tala. Tuttina han bunamain tuttas vischnancas ditg Gea ad il credit da 29,2 milliuns francs.
Be la vischnanca da Ferrera e la vischnanca da Rongellen han refusà stgars il credit. Ferrera cun 5 vuschs Gea e 5 vuschs Na e Rongellen mintgamai cun 9 vuschs per ed encunter.
Be paucs e paucas a l'urna
La participaziun a la votaziun è dentant stada bassa cun radund 24%. Quai na fa dentant betg surstar, damai che la refurma n'ha strusch procurà per discussiuns ordavant e damai che tut las partidas grischunas han proponì d'acceptar quella.
Per tge vai?
Actualmain sa chattan la Dretgira chantunala e la Dretgira administrativa dal Grischun èn differents lieus a Cuira. Cun la fusiun ad ina suletta dretgira – la Dretgira superiura – dovra quella ina nova sedia. Perquai duai il bajetg statal en la Grabenstrasse 30 vegnir sanà ed engrondì. En il bajetg istoric sa chatta actualmain anc l'Uffizi per la construcziun bassa dal Grischun.
-
Bild 1 von 5Legenda: Ina fotografia da l'onn 1911 dal bajetg statal. Archiv da la citad da Cuira -
Bild 2 von 5Legenda: Fotografia enturn l'onn 1915, cura che la sala serviva anc per las debattas dal parlament chantunal. Archiv da la citad da Cuira
-
Bild 3 von 5Legenda: Fotografia actuala dal bajetg statal en la Grabenstrasse a Cuira. RTR
-
Bild 4 von 5Legenda: Sper la renovaziun dal bajetg istoric è planisà in bajetg annex per stgaffir avunda plazza. Visualisaziun Chantun GR
-
Bild 5 von 5Legenda: Il model ch'ils architects han preschentà. RTR
La fusiun da las dretgiras fa part da la refurma da giustia, ch'è medemamain stada en votaziun. La refurma ha survegnì cler sustegn dal suveran.