Er quest onn emprova il chantun da tegnair il traffic sin las autostradas durant ils firads. Igl è puspè da quintar cun bloccadas sin l'A28 e l'A13. Ils 9 da mars èn represchentants da la Confederaziun, dal chantun, da las regiuns e da las vischnancas s'inscuntrads ad ina maisa radunda.
Mesiras per restrenscher il traffic sin las autostradas:
- Tar las sortidas tranter Zezras e Tusaun datti mesiras che pertutgan per part il traffic en direcziun sid, ed era ina part dal traffic en direcziun nord.
- Sin l'A28 cuntinuescha l'emprova da pilot da l'enviern passà. La polizia serra pliras sortidas en la regiun Partenz Dadora. Er il chantun Son Gagl sa participescha, cun mesiras a Bogn Ragaz.
- En il nord da Zizers datti vinavant il sistem per «dosar il traffic».
La finamira da las mesiras è da tegnair liber las vias en las vischnancas sper las autostradas. Emprimas experientschas mussan tenor il chantun ch'ins ha pudì tegnair liber uschia las vias per il traffic public e per cas d'urgenza.
L'effect da las mesiras vegn il chantun ad evaluar suenter Pasca. Pir lu saja quai raschunaivel, damai ch'i vegn er a depender da l'aura quant grond ch'ils incaps vegnan ad esser, scriva il chantun en sia communicaziun.
audio
Per tadlar: las novitads da las 11:00
ord RTR Audio dals 10.03.2023.
laschar ir. Durada: 3 minutas 23 Secundas.
