Accidents mortals da chatscha èn rars. Ils ultims 23 onns hai dà en tut 70 – set da quels chaschunads d'ina buis, quai mussa la statistica dal Post da consultaziun svizzer per la prevenziun d'accidents (BFU). Sch'ins guarda pli exact sin ils set accidents cun la buis, sajan quatter da quels chaschunads d'in auter chatschader, en tschels trais cas ha il chatschader blessà sa sez, quai ha declerà Flavia Bürgi che lavura tar il Post da consultaziun svizzer per la prevenziun d'accidents. En in cas è per exempel in sajet ì liber cura ch'il chatschader è crudà d'ina plaunca giu. Ils accidents mortals da chatscha sajan ids enavos ils ultims onns. 21 persunas èn mortas ils ultims 10 onns en Svizra cun ir a chatscha. La statistica dal BFU quinta be ils cas d'accident e betg cas criminals u suicids.
Crudadas en la muntogna u blessuras tras la rebattida
La maioritad dals accidents da chatscha han da far cun il terren e betg cun la buis. Els èn pia crudadas en la grippa e la muntogna. Quai vala tant per accidents cun persunas blessadas sco era per accidents mortals. Be ina pitschna part dals accidents ha propi da far cun l'arma. Ma era quai po capitar. Il pli frequent en quest connex sajan blessuras tras la rebattida da la buis. Las cifras dal BFU mussan che chatschadras e chatschaders han blessuras da la spatla, dal culiez, dal chau u dal nas tras la rebattida da la buis. Era donns d'udida tras il sajet èn pussaivlas, declera Flavia Bürgi dal Post da consultaziun svizzer per la prevenziun d'accidents.
Cas da chatscha per la procura publica
Sch'i dat sbagls durant chatscha pon quels daventar in cas per la procura publica. Uschia s'occupa quella sch'in chatschader u ina chatschadra sajetta sin in animal betg confurm a la lescha. Concret po quai esser sch'el u ella sajetta in animal betg lubì ubain sajetta ord memia gronda distanza. L'onn passà sajan quai stads circa 40-50 cas. I dat er cas criminals da chatscha, pia mazzaments, ma quels èn rars. La procura publica vegn immediat activa e maina las inquisiziuns uschè svelt ch'i sa tracta d'in cas mortal. Las inquisiziuns fa ella lura per regla en collavuraziun cun la polizia.
Ulteriurs cas criminals grischuns:
