Update dals 14-04-2025
La regenza grischuna duai laschar sanar la deponia veglia da la Ems-Chemie. Quai pretendan ils Verds cun ina petiziun. Ils 14-04-2025 ha la partida surdà las enturn 1'500 suttascripziuns a la regenza. Las suttascripziuns èn vegnids ensemen en var in'emna.
Tenor l'Uffizi per natira ed ambient dal Grischun èsi pussaivel ch'il trichloreten en l'aua da baiver deriva da l'anteriura deponia. Las examinaziuns na possian però betg cumprovar quai cleramain. Perquai na pretenda l'uffizi betg da sanar la deponia, mabain be da survegliar quella durant quatter onns. Er il minister d'ambient Jon Domenic Parolini ha gia argumentà sumegliant il zercladur da l'onn passà en il Cussegl grond: Las valurs mesiradas da la substanza che po chaschunar cancer sajan memia bassas per cumandar da sanar la deponia. Qua saja il chantun lià vi da la lescha federala che prevesa in obligatori da sanar pir sche las valurs surpassan tschertas limitas.
Argumentaziun da vischnanca e WWF: Be survegliar cuntrafa a la lescha federala
Tant la vischnanca da Domat sco era l'organisaziun d'ambient WWF argumenteschan che l'anteriura deponia saja la suletta funtauna plausibla per la substanza trichloreten en l'aua da baiver.
D'ina vart haja il chantun valità tut las ulteriuras 15 deponias sin l'areal da l'Ems-Chemie cun la conclusiun ch'ellas na sajan betg da survegliar ed era betg sa sanar. Da l'auter maun na dettia nagins indizis ch'il terren tranter la pumpa d'aua da funs e la deponia saja vegnì duvrà ina giada per auters intents che pudessan declerar las valurs da trichloreten. Uschia restia la deponia sco suletta funtauna plausibla. E sche quella saja identifitgada, prescrivia la lescha federala ch'ella stoppia vegnir sanada.
Perquai [che l'uffizi] n'ha betg tadlà ils basegns da la vischnanca, avain nus dad ir la via giuridica.
Il WWF e la vischnanca pretendan dal chantun ch'i vegnia sclerì consequentamain e detagliadamain danunder che la substanza nuschaivla en l'aua deriva e che la deponia vegnia sanada – quai svelt e cun survegliar durant quest temp stretgamain il lieu. Cun la decisiun da be vulair survegliar, acceptia il chantun il ristg che substanzas nuschaivlas da la deponia vegnian en l'aua da baiver.
Quai avess consequenzas gravantas per carstgauns e natira.
La finamira, era da la vart da la vischnanca, è d'eliminar cumplettamain tut las contaminaziuns da l'aua da baiver.
Il zercladur 2024 ha il Telesguard explitgà l'entira situaziun en connex cun la decisiun dal chantun da survegliar la deponia e betg sanar quella:
