Cun il turissem grischun vai bain – gea, schizunt fitg bain. Malgrà la mancanza da naiv sur ils dis da festa han dapli persunas passentà lur dis libers en ils culms grischuns che l'onn passà. La hotellaria ha fatg plus da 3% e las pendicularas perfin in plus da bunamain 6%. La purschida saja stada buna ed ils giasts fidaivels, uschia Martin Vincenz da Grischun Vacanzas. Pia, il Grischun ha tutta raschun da far in viva sin quai. E tuttina – uschè simpel n'è quai quels dis tuttavia betg. Motiv: la gronda tragedia da Crans-Montana. Uschia hai er dà ina minuta da silenzi durant il pled da bainvegni dal president da Grischun Vacanzas, Jürg Schmid.
Quella minuta da silenzi era fitg impurtanta per nus. Nus vulevan uschia mussar nossa solidaritad cun Crans-Montana.
Che l'apero da Bumaun ha insumma gì lieu ils 5 da schaner n'era avant in pèr dis na betg cler, sco Martin Vincenz, mainafatschenta da Grischun Vacanzas, declera.
Nus avain decis da far l’apero. Sa chapescha cun in tschert mument da commemoraziun e cumpassiun. E tuttina ston ins puspè guardar enavant.
Emoziuns ambivalentas
L'atmosfera en sala da l'auditori da la GKB è da princip buna. Dad ina vart vai fitg bain cun il turissem grischun. Fitg bunas cifras malgrà pauca naiv. E da l’autra vart è qua il schoc da l'incendi da Crans-Montana che fatschenta fermamain ils turistichers grischuns.
Quai è da vaira in grond schoc. Gea, ins ha propi in curius sentiment ussa ch'igl è capità uschè insatge en in temp che la glieud è vegnida per far vacanzas, avair in bun temp, e lura uschè ina tragedia.
Ed er a Marcus Caduff, cusseglier guvernativ e manader dil departament da turissem, van ils davos dis blers patratgs tras il chau. Cunzunt è il chantun Vallais cun ses culms ed il turissem fitg sumegliant a noss chantun. Quai na fa betg pli simpel la situaziun ... anzi ...
Quai pudess natiralmain er capitar tar nus. Er quai n'è gea betg exclus. Reagissan nus tuttina sco il Vallais?
Patratgs pesants. Sumegliant tuni era ord vista da la hotellaria. Ernst Wyrsch, mainafatschenta da Hotellerie Suisse Grischun descriva ils patratgs or da la vista d'in gastronom che posseda in u plirs locals.
Mintga hotelier sa dumonda, avess quai er pudì capitar tar mai? Cura che blers umans èn en in local, han ins pensà vi da tut? Eran tuttas portas avertas? Portas d'urgenza? Han ins in concept d'urgenza? Sche ins fa quai quatter, tschintg giadas, pens'ins, gea quai funcziuna.
Uschespert sco ils carstgauns sa sentan segirs e memia bain, lura succedan sbagls. La disciplina giaja lura a perder, uschia Ernst Wyrsch. E quai mussa uss il cas da Crans-Montana: la segirezza saja en mintga cas ed adina il pli impurtant.
La cumpassiun per las unfrendas, ils blessads e lur famiglias da l'incendi da Crans-Montana è gronda – era en la scena da turissem grischuna.