Artista Ernestina Abbühl - 20 onns art ed in legat biblic

Dapi 20 onns sa deditgescha Ernestina Abbühl consequentamain al palpiri e la tschaira. Quai ch'ha cumenzà sco hobi è madirà ad in’expressiun artistica autonoma: lavurs da reliev, creadas a moda multifara, en trais dimensiuns, savens inspiradas da la natira.

Reliefs Ernestina Abbühl

Sias ragischs en l'Engiadina caracteriseschan la lavur dad Ernestina Abbühl, era sche l'artista viva oz a Sargans. Glatsch, grip, terra e flurs alpinas tutgan tar ses motivs repetitivs. Las impressiuns ramassa ella giuadora en la cuntrada – elavuradas vegnan ellas pli tard en l'atelier a Berschis. Mintga ovra è in unicat. Per il giubileum da 20 onns lavura l'artista vi d'in manual. Ella documentescha sia lavur, mussa fotografias, patratgs e motivs davart sias lavurs. Ils 160 exemplars lia ella a maun – cun garnì creschì si en la tecnica tradiziunala. Il cudesch chapescha ella sco ina documentaziun persunala da sia vita.

Cudesch da lavur

In’ovra biblica

Sia ovra la pli nova porta il titel «urazchun – tschiel ed infiern». Ella sa basa sin 550 paginas d’ina bibla rumantscha da 1743, stampada a Scuol. La bibla era donnegiada fermamain pervia d’in donn d’aua – per blers fiss quella senza valur. Betg per l’artista: «Jau hai survegnì questa bibla da miu bab – jau hai pensà ch'jau fetsch segir ordlonder insatge bel.» Durant mais ha Abbühl fatg cun premura pagina per pagina. 550 paginas ha ella rinforzà cun tschaira, faudà ellas tenor il gieu d’uffants «tschiel ed enfiern» e montà ellas sin diesch tavlas da lain alvas – sa basond sin ils diesch cumandaments.

Cun l’ovra d’art vul ella reintegrar la bibla en las abitaziuns. Sia idea ha era influenzà istoric-culturalmain: «Pli baud aveva mintgin ina bibla a chasa – ed ussa è questa cultura svanida. E bel fiss sche questa cultura turness puspè a chasa.»

Reliev «urazchun tschiel ed infiern»