Ovs regiunals, ovs da la marca Bio ubain ovs importads. La schelta è gronda. Normalmain. Per il mument sa mussa in pau in’auter maletg. Tut tenor cura ch’ins va en stizun paran ils regals plitost vids. In trend che regia surtut tranter Nadal e Bumaun, sco er uss curt avant Pasca – e quai gia dapi quatter onns. Avevan ins en l'onn 2022 anc in surpli dad ovs, regia ussa in auter extrem, sco Daniel Würgler da GalloSuisse declara.
Quest onn è la situaziun perfin anc pli tendida che l’onn passà. Quai perquai che la dumonda è creschida.
Anc mancan las cifras exactas per l’onn 2025. Quellas duessan vegnir publitgadas en pauc temp, di Daniel Würgler. Dentant, sch'ins dat in sguard sin las cifras da l’onn 2024 lura ves’ins gia in plus da bunamain 5% cumpareglià cun l’onn passà. Munta concret: En il 2024 consumava ina persuna en svizra circa 198 ovs ad onn – quai èn nov ovs dapli ch'en il 2023.
Daco che quai saja uschia, haja plirs motivs. In è cler: L’ov è dumandà. Vegl, giuven, sportista u simplamain «fan da brunch» – l’ov porscha sper minerals e vitamins cunzunt blers proteins.
Proteins ch’èn per il mument fitg dumandads, laschan quels gea era crescher ils musculs – e quai tut per in pretsch favuraivel. La dumonda suenter ovs saja pia gronda, nua che las giaglinas na pon betg propi suenter cun la producziun.
Oz tegn’ins las gaglinas pli ditg, quai che saja dal reminent positiv. Mo, pli veglias che las gaglinas vegnian e pli mala è la qualitad ed era la quantitad dals ovs.
Quai fatg gioghia era ina rolla tar la producziun dals ovs. Pia, ina gronda dumonda versus ina purschida limitada – vegn lura anc Pasca vitiers, nua che ovs sajan spezialmain dumandads, lura possia quai bain ina giada vegnir pli stgars cun la purschida dad ovs en ils regals da las stizuns. Sin dumonda dad RTR conferma quai era il Coop. Bunamain tut las regiuns en Svizra sajan medemamain pertutgadas. Era sch'igl haja tut en tut anc avunda ovs, possia dentant capitar che la dumonda surpassia ad interim la purschida, sco Coop declera.
Surtut las spezialitads regiunalas sajan per il mument pli raras che uschiglio. Per exempel: in ov che vegnia producì en la regiun da Turitg e vendì sco «Züri-Regio-Ei» na possian ins betg simplamain vender sco ov regiunal en il Grischun u en in auter chantun, di Daniel Würgler.
Ovs svizzers, ovs regiunals, ovs da la marca Bio ubain ovs importads: i po bain esser ch'ils regals paran uss in pau pli vits che usità. Sin il pli tard cura che Pasca è passà è la purschida usitada puspè avant maun. Sin ils pretschs n'haja quai si e giu nagina influenza, damai che quels vegnian definì e fixà per l'entir onn.