Mintga primavaira sa radunan las participantas ed ils participants da la Banca Chantunala Grischuna en la Stadthalle a Cuira. Vi da maisas lungas cun tuaglias alvas taidlan ellas il rapport da fatschenta e giaudan in di communabel e forsa er per discutar davart il plant cun il qual la banca è confruntada.
-
Bild 1 von 3. Sco mintg'onn sa radunan participantas e participants en la Stadthalle a Cuira. Bildquelle: RTR.
-
Bild 2 von 3. President dal la Banca Chantunala Grischuna Heinz Huber. Bildquelle: RTR.
-
Bild 3 von 3. Daniel Fust, il CEO da la Banca Chantunala Grischuna. Bildquelle: RTR.
Avant intgins dis è la Banca Chantunala Grischuna stada en las lingias grassas. Motiv è in plant cunter la GKB e sia societad affiliada, la banca BZ, en connex cun in'emissiun d'aczias. Curt suenter eri lura vegnì enconuschent che l'interprendider grischun Remo Stoffel è l'accusader privat che stat davos il plant.
Malgrà atgisa buna atmosfera a la radunanza
L'atgisa è dentant betg stada in grond tema a la radunanza da possessurs da scrits da participaziun. Il president da la Banca Chantunala Grischuna Heinz Huber ha curt mess a lieu l'accusaziun. Uschia ha el ditg ch'els considereschan quella sco nungiustifitgada. Els refusan las renfatschas e vegnan a sa defender encunter ellas, ha el ditg al cumenzament da ses referat a la radunanza. Suenter n'è l'atgisa betg pli vegnida tematisada sin il palc – en il public è ella però stada tema.
A mai para ch'i saja stà fitg intransparent e ch'els hajan embellì la problematica da l'accusaziun.
Uschia di in visitader e participant, che la tematica pareva per el intransparenta e ch'ins haja empruvà d'embellir la tematica da l'atgisa. Suenter il scandal da l'onn passà en l'Austria da René Benko saja tenor el era en la resposabladad dal chantun Grischun da controllar, tge che la banca fetschia.
Il signur Stoffel ha gia savens fatg uschia chaussas ed jau crai ch'el n'ha nagina schanza.
La gronda part dals visitaders e la visitadras na paran dentant betg da far quitads pervia da l'atgisa. Uschia din singuls ch'els na prendan betg daltut serius l'accusader Remo Stoffel e ch'els hajan plaina fiduzia en la Banca Chantunala Grischuna.
La radunanza è stada sco era ils onns passads, plitost ina festa e sper intginas cifras da la banca è il focus plitost stà sin la culinarica, la show da musica e regurdientschas a radunanzas dal passà.