Banca Chantunala Grischuna - Plant da Remo Stoffel è be stà tema a l'ur da la radunanza

Mintga primavaira sa radunan las participantas ed ils participants da la Banca Chantunala Grischuna en la Stadthalle a Cuira. Vi da maisas lungas cun tuaglias alvas taidlan ellas il rapport da fatschenta e giaudan in di communabel e forsa er per discutar davart il plant cun il qual la banca è confruntada.

Avant intgins dis è la Banca Chantunala Grischuna stada en las lingias grassas. Motiv è in plant cunter la GKB e sia societad affiliada, la banca BZ, en connex cun in'emissiun d'aczias. Curt suenter eri lura vegnì enconuschent che l'interprendider grischun Remo Stoffel è l'accusader privat che stat davos il plant.

Malgrà atgisa buna atmosfera a la radunanza

L'atgisa è dentant betg stada in grond tema a la radunanza da possessurs da scrits da participaziun. Il president da la Banca Chantunala Grischuna Heinz Huber ha curt mess a lieu l'accusaziun. Uschia ha el ditg ch'els considereschan ella sco nungiustifitgada. Els refusan las renfatschas e vegnan a sa defender encunter ellas, dia el al cumenzament da ses discurs da la radunanza.

Suenter n'è l'atgisa betg pli vegnida tematisada per il rest dal di sin il palc – dentar il public èsi dentant stà in pau in tema. Uschia di in visitader e participant, che ad el pareva intransparent e ch'ins haja empruvà da embellir la tematica da l'atgisa. Oravant tut era suenter il scandal da Benko da l'onn passà saja tenor el era en la resposabladad dal chantun Grischun da controllar, tg che la banca fetschia.

La gronda part dals visitaders e la visitadras na paran dentant betg da far quitads pervia da l'atgisa. Uschia din singuls ch'els na piglian betg dal tut serius l'accusader Remo Stoffel e ch'els hajan plaina fiduzia en la Banca Chantunala Grischuna.

La radunanza è stada sco era ils onns passads, dapli ina festa e dasper in pèr cifras da la banca è stà il focus plitost sin la culinarica, la show da musica e regurdientschas a radunanzas dal passà.