2'630 persunas han visità sonda la 35avla radunanza da scrits da participaziun da la Banca chantunala a Cuira en la Stadthalle. Gia il favrer aveva la GKB annunzià in gudogn da record da prest 208 milliuns francs. Quai ha gì in effect positiv sin la dividenda. Per mintga scrit da participaziun è vegnì assegnà 42.50 francs. Dal resultat positiv ha er il chantun Grischun profità. Lez ha retschavì 92,8 milliuns francs.
Model da fatschenta sco factur-clav ed il svilup dal scrit da participaziun
La banca haja diversifitgà consequentamain ses retgavs ils ultims onns. Ordaifer il chantun persequiteschia ella vinavant quest model da fatschenta cumprovà, tranter auter cun sias participaziuns. En la sedia principala en il Grischun sa focusseschia la banca er en il futur sin duas pitgas da retgav principalas, surtut sin la fatschenta da tschains classica e sin la fatschenta d'investiziuns e da provediment, scriva la banca vinavant. Er il curs dal scrit da participaziun saja sa sviluppà a moda positiva durant ils ultims trais onns. El saja restà ordvart stabil ed haja surpassà cun ina performance da 22,7% cleramain il SPI ed er il SPI Bancas, l'index da las bancas svizras.
Nov commember da direcziun: Pascal Pernet
Ultra da quai ha la GKB beneventà il nov commember da la direcziun: Pascal Pernet è dapi il 1. d'avrigl 2023 responsabel per l'unitad da fatschenta Martgads cun var 500 cussegliadras e cussegliaders a Cuira ed en las regiuns. El è il successur da Thomas Roth che va en pensiun la fin da matg. Pernet è naschì il 1973 a Samedan e creschì si a Sent en l'Engiadina.
Or da l'archiv:
