Organisatoricamain haja tut funcziunà, scriva la citad en ina communicaziun. Ma igl haja er dà ina u l'autra sfida. Il punct discutà il pli ferm il 2022 saja stà l'energia. Ils custs supplementars hajan ins sentì. Er la gronda purschida d'auters festivals che han er puspè gì lieu suenter corona han chaschunà ch'ils bigliets na sajan betg stads vendids ora cumplettamain. Perquai n'hajan ins betg cuntanschì las cifras da l'onn avant e per l'organisatura hai uschia dà il deficit da 500'000 francs. A lunga vista vul la First Event SA dentant restar tar l'event e resta sin ses curs da puspè edir quel.
Er citad tira bilantscha positiva
Cun il Big Air a Cuira hajan ins surpassà las finamiras, declera Urs Marti. L'attractivitad per persunas giuvnas ed il rinforzament da l'image sco citad dinamica e moderna sajan impurtantas e la citad porschia la dretga plattafurma per mussar quai. Er la valurisaziun da prest 5 milliuns saja impurtanta per la citad. La citad è betg participada vi dal gudogn ni vi da la perdita da l'event.
Plinavant haja l'hotellaria da la citad pudì profitar ferm Ins haja nudà 2'500 pernottaziuns e saja stà vendì ora. Quai ha procurà per in record da pernottaziuns il 2022 en la citad da Cuira.
Finanziaziun è in grond tema
Fin l'onn 2026 investescha la citad da Cuira 2,38 milliuns francs per il Big Air. Il suveran ha approvà la summa avant radund in onn a l'urna. Quest onn ha la citad pajà radund 680'000 francs per organisar l'event.
Potenzial entras svilup da l'areal
Il svilup da l'areal sin l'Obere Au porta in grond potenzial per in event sco il Big Air Chur. Sche la populaziun approva il mars la halla da la citad nova sin l'areal, vegn era quel ad esser ina part dal Big Air. Quella portia intgins avantatgs economics sco er ecologics visavi la tenda ch'è stada fin uss sin l'areal. Sche la halla vegn dentant realisada, ston ins quintar ch'i dettia ils onns 2024/25 restricziuns sin l'areal. Sche tut giaja dentant bain possia la halla gia vegnida introducida al Big Air 2025.
