L'emprima emna da chatscha è passada. Var 5'200 chatschaders e chatschadras èn da viadi quest onn tras il guauds e sin las muntognas. 4'610 animals sajettads èn fin ussa vegnids registrads da la surveglianza da chatscha. Lukas Walser, responsabel per la chatscha e selvaschina tar l'Uffizi da chatscha e pestga dal Grischun è cuntent cun l'emprima emna.
Tschiervs en la sumbriva
Ina grond'influenza sin la chatscha haja gì la bell'aura da quest onn. Ils dis da bell'aura hajan difficultà la chatscha da tschiervs. Quels tschertgian la sumbriva en il guaud tar temperaturas autas, uschia Walser. Per ils chatschaders saja quai difficil. Er sche l'emprim di saja stà excellent per la chatscha da tschiervs sajan vegnids sajettads var 100 tschiervs damain che auters onn. Per la chatscha da chamutschs sin las muntognas sajan las cundiziuns suleglivas dentant stadas bunas, il dumber da chamutschs saja circa en il rom dals auters onns. Il medem valia er per la chatscha da chavriels, da quels èn schizunt vegnids sajettads 250 dapli che auters onns.
Tge effect ha il luf?
In factur pli nov per la chatscha è il luf. Sch'in luf è preschent en ina regiun, fugia la selvaschina dad el. Quai pudess avair in'influenza sin il success da chatscha da las chatschadras ed ils chatschaders. Per savair dir quant grond che quest effect saja precis, saja dentant anc memia baud, uschia Walser.
