Martin Candinas, suenter in mais è la Festa federala da tir 2026 finida – sinceramain, sco president dal comité d'organisaziun, quant cuntent essas Vus ch'igl è uss finì?
Jau sun enorm cuntent che nus n'avain gì nagins accidents, nagins problems pli gronds e che nus avain pudì realisar la festa per cuntentientscha da la gronda part da las tiraduras e dals tiradurs. Da qua ennà sun jau fitg levgià, e natiralmain era ch'i va uss a fin.
Var 35'000 tiraduras e tiradurs èn vegnids a Cuira durant la festa federala da tir – co vesi ora cun l'interess da las visitadras e dals visitaders ed essas Vus cuntents cun quai?
Nus essan fitg cuntents. Nus avain gì 2000 persunas che han vulì far part tar il tir public, pia persunas, che n'han betg da far insatge cun schluppets che vulevan ina giada empruvar quant buna che lur egliada è propi, e quai è exact quai che nus avain la finala vulì cuntanscher, mussar, tge ch'ina tala festa federala da tir munta.
Tenor il comité d'organisaziun n'haja dà nagins incaps pli gronds durant la festa – tge è tenor Vus la raschun per quai?
Tiraduras ed ils tiradurs han ina fitg buna disciplina. Els san ir enturn cun lur armas ed els surpiglian er responsabladad. Da l'autra vart avain nus era gì gidantras e gidanters ch'han fatg ina lavur da controlla excellenta e che stuevan era disciplinar in u l'auter che na vuleva betg sa tegnair schuber da tut – ed exact quai dovri era. Igl è crai jau la maschaida da questas chaussas, e perquai van tut mes cumpliments a las persunas che han gidà e che han pussibilità da far ina tala festa da tir cun success.
Il preventiv per la festa da tir è vegnì calculà cun 14 milliuns. Pudais Vus gia valitar co che quai è la fin finala finanzialmain?
Nus essan optimistics che quest preventiv va si. Era che nus pudain dar a las uniuns quellas contribuziuns che nus avain empermess ad ellas. Las uniuns han furnì summas considerablas per che la festa da tir possia insumma avair lieu. Nus essan optimistics da vegnir ora cun ina nulla, e sch'igl è in zic dapli fissi il davos bel per tut quels che han lavurà per quellas festas.
Quant fitg ha Cuira ed il chantun Grischun profità da questa occurrenza gronda?
Jau sun persvas che Cuira e cunzunt era ils lieus che han gì in stan da sajettar han profità considerablamain da questa festa. Bleras tiraduras e tiradurs èn stads sur notg, igl è enconuschent ch’igl è buns consuments e na baivan betg mo aua da spina. Per in chantun turistic sco il Grischun datti pauc pli bel che d'avair societads che vegnan en noss chantun per giudair dis nunemblidaivels en buna cumpagnia.
Sco president dal comité da l'organisaziun essas Vus stà en tut ils posts externs. Tge ha fatg a Vus persunalmain la pli gronda impressiun?
I vegn lavurà cun in enorm engaschi, cun enorm bler cor e fitg creativ. Jau crai che quai è quai che resta la finala – las amicizias era tranter las societads da tir, vesair las fatschas cuntentas cura che ch’i din a la fin: «hey, dastgain nus anc far ina foto finala?» E cura ch’ins vesa quests maletgs vegn ins bunamain in zic emoziunal e pensa: bain, per tut quai han ins lavurà uschè intensiv. E quai è la finala la pli bella renconuschientscha e la pli bella paja per la lavur ch'ins ha prestà ils ultims dis.