L'entschatta da quest onn ha la procura publica dal Grischun avert in'inquisiziun penala en connex cun la bova da Bondo. Sin il banc da las persunas pertutgadas sesan en tut tschintg persunas: in geolog extern, dus collavuraturs da l'Uffizi da guaud e privels da la natira dal chantun Grischun e dus represchentants da la vischnanca da Bregaglia. Latiers tutga er la presidenta communala da lez temp, Anna Giacometti, ussa cussegliera naziunala da la PLD. En connex cun ella datti tenor las infurmaziuns da Radiotelevisione Svizzera (RSI) in conflict d'interess cun almain dus derschaders. Vegn il process davart la tragedia dal Piz Cengalo insumma lieu en Engiadina sut questas circumstanzas?
Sin la dumonda da la FMR, sche insumma e cura ch'il process vegnia fatg, n'ha la Dretgira regiunala Malögia betg vulì prender posiziun ed ha fatg attent ch'i na dettia en general naginas infurmaziuns davart cas pendents. Era davart il conflict d'interess n'ha nagin prendì posiziun. Sche las infurmaziuns èn definitivamain avant maun, lura vegnian ellas publitgadas sin la pagina d'internet da la Dretgira regiunala.
Cusrin ed amia
Sco che RSI ha scrit gia l'avust 2024 en in artitgel vai per il president da la dretgira Malögia, Franco Giacometti, en conflict d'interess. Sco che las medias svizras talianas scrivan vinavant, n'è el betg mo il cusrin dad Anna Giacometti, mabain er anteriur president communal da la vischnanca da Bregaglia e collega da partida da sia cusrina en la PLD.
Ma er en connex cun la commembra da la dretgira Rosita Fasciati datti para dumondas sch’ella saja avunda independenta per quest cas. Ella n'è numnadamain betg be commembra da la PLD – Rosita Fasciati è era la quinada dad Anna Giacometti e para er ina buna amia. Ultra da quai ha Rosita Fasciati lavurà il di da la bova l'avust 2017 per l'administraziun communala da Bregaglia. Tenor RSI han Franco Giacometti e Rosita Fasciati renunzià uffizialmain da sa participar a tut ils process giuridics en connex cun la bova dal Piz Cengalo.
Naginas dumondas areguard l'independenza
Il process è insumma vegnì instradà suenter ch'ina expertisa d'in geolog independent era vegnida il december 2023 a la conclusiun ch'ins avess pudì evitar la mort dad otg persunas cun bloccar sendas en la regiun da privel.
Questa expertisa è vegnida fatga per incumbensa dals confamigliars dals otg disgraziads l'avust 2017. Cunquai che la Procura publica grischuna na vesa tenor RSI era nagin conflict d'interess pli areguard l'independenza da la Dretgira regiunala Malögia, possian be pli ils accusaders exprimer critica.
Sin dumonda da la FMR ha lur advocat, Reto Nigg da Cuira, confermà ch'ils accusaders privats ch'el represchentia en la causa Bondo n'hajan betg mess en dumonda l'independenza da la Dretgira regiunala Malögia. Perquai quinta el actualmain anc adina ch'il process vegnia fatg en l'Engiadina e betg avant in'autra dretgira grischuna independenta.
Uschia ston ins ussa spetgar las ulteriuras communicaziuns online da la Dretgira regiunala Malögia. Cun quai che l’ultim quartal da l’onn cumenza gia l’emna che vegn pon ins forsa quai bainbaud quintar cun novas infurmaziuns en chaussa.
