En ina communicaziun a las medias scrivan las pendicularas da Breil l'emprim da matg 2026 da sentiments da primavaira. Ellas scrivan da vulair carmalar ils osps cun ina visita en l’aria frestga da muntogna, fan quaidas cun dis pli lungs ed emprims sentiments da stad.
Per far gust da planisar las emprimas turas en ils culms annunzian las pendicularas da metter en funcziun la sutgera da Breil a Crest-Falla dad Ascensiun, da Tschuncaisma, da Sontgilcrest ed a partir dals 20 da zercladur 2026 cumenza il manaschi da stad ordinari. Da la pussaivladad da giudair la bella vista sin terrassa da l'ustaria da muntogna Burleun, a Crest Falla sin 1'725 meters sur mar, na scrivan las pendicularas dentant nagut. Ils osps ston sa cuntentar cun il panorama da l'ustaria da val La Famusa.
Ustaria è venala
I n'è era betg da smirvegliar che las pendicularas na scrivan nagut da l'ustaria Burleun. Per l’ina è l’ustaria da muntogna dapi prest nov onns en possess da la Gastro Event SA e per l’autra serrada dapi ils 15 da mars 2026. E las schanzas che questa ustaria avra d'Ascensiun n'èn betg fitg grondas.
Sco quai che la Gastro Event SA ha gia fatg a savair a chaschun da la fin da la stagiun d’enviern 2026 è l’ustaria venala. L'inserat sin il portal da vendita da Gastro Suisse, l’organisaziun tetgala da la gastronomia svizra, datescha dals 12 da favrer 2026 ed è vegnì actualisà ils 9 d’avrigl 2026. Davart il pretsch da cumpra da l'ustaria Burleun na tradescha l'inserat, che fa gust per in manaschi cun 130 plazs da seser en l'intern e cun 280 plazs sin terrassa, nagut. Persuenter tradescha l'inserat ch’i saja pussaivel da surpigliar l'ustaria sin l’entschatta matg 2026 u tenor cunvegnientscha.
L'interess è davant maun
Cun surpigliar l'ustaria Burleun sin l'entschatta matg n'èsi nagut. Quai conceda il president dal cussegl d'administraziun da la Gastro Event SA, Peter Brügger sin dumonda da la FMR. Las schanzas che l'ustaria avra pli tard sin il cumenzament dal manaschi regular da stad da las pendicularas èn tuttina intactas, sco quai che Peter Brügger conceda. «L'interess per cumprar l’ustaria è avant maun.»
Blers dals interessents n'èn tenor las explicaziuns da Peter Brügger dentant betg conscients da las sfidas da manar in'ustaria da muntogna. Tuttina manegia el da sa cunvegnir la finala cun in dals interessents. «Uschè svelt ch'il contract è sut tetg vegn jau era a communitgar quai.» Peter Brügger di d'esser conscient da la muntada turistica che l'ustaria da muntogna ha per Breil. El ha fatg attent che la Gastro Event SA maina er las ustarias Surselva en il vitg da Breil e durant la stad l'ustaria sper l'indriz da minigolf. «Vi da quai na sa mida per il mument nagut.» Pervi da la vendita da l'ustaria fa Peter Brügger valair motivs famigliars.
Letras grassas
L’ustaria da muntogna Burleun, respectiv ses possessur, èn gia stads en il focus da la publicitad avant dus onns. Pervia d'ina sentenzia en connex cun falsificaziuns da documents e cugliunarias professiunalas ha il possessur stuì sa preschentar davant ina dretgira bernaisa. Sco quai che RTR ha rapportà avant dus onns èn ils donnegiads da la cugliunaria sa cunvegnids cun il delinquent che quel paja enavos la summa da delict aifer in tschert temp.
Rapportà han las medias avant dus onns d'ina summa da delict da passa 6 milliuns francs. Sche la vendita actuala da la ustaria Burleun stat directamain en connex cun la sentenzia d'avant dus onns è intschert. A quella dumonda n'ha er il represchentant giuridic dals donnegiads, Jürg Wernli, betg pudì respunder sin dumonda da la FMR.
S’exprimì curt en chaussa è er il president communal da Breil, Roman Flepp. El ha ditg a la FMR ch’il Burleun saja fitg impurtant per la vischnanca. Ed i na saja propi betg tuttina co ch'i giaja vinavant cun quell’ustaria. La suprastanza communala spetgia cun attenziun tgi che vegn a cumprar il Burleun che saja impurtant pervia da sias capacitads l'enviern, ussa dentant era cun il concept da stad da las pendicularas.
In concept che fa reclama cun sentiments da primavaira. Enfin ch’ils possessurs da l’ustaria han chattà ina cumprader ston ils osps anc prender cun sasez l'agen puschegn per giudair la bella vista da la terrassa dal Burleun.