L'onn passà, cura ch'il privel d'ina bova era anc grond, ha la populaziun da Brinzauls pudì inoltrar ina dumonda da dischlocaziun. 40 annunzias hai dà, ma curt suenter l'ultim termin d'annunzia hai dà la novitad ch'i saja puspè pussaivel da turnar a Brinzauls. Per dar a la populaziun in'ultima schanza da sa decider, ha la vischnanca prolungà il termin sin fin ils 9 da mars. Intginas midadas hai anc dà.
Tut en tut èn quai ussa 45 dumondas da dischlocaziun – concret èn quai 90 tegnairchasas, da total 167 a Brinzauls. Chasas cun pliras abitaziuns han stuì far la dumonda communablamain, perquai datti pli paucas dumondas che tegnairchasas che vulan midar.
Quellas dumondas n'èn dentant betg liantas. Tgi che vul retrair questa dumonda e returnar a Brinzauls po anc far quai, fin ch'il project da dischlocaziun va en vigur. Il president communal dad Alvra, Daniel Albertin, n'hai betg fatg surstar che quellas persunas ch'han schon decidì da bandunar la vischnanca vulan far quest pass era enavant.
Nus avain gia spetgà ch'i na dettia betg grondas midadas.
Quai che haja persvadì in u l'auter da far ina dumonda da dischlocaziun sajan las midadas da la lescha da bajegiar. L'obligaziun d'utilisaziun è per exempel vegnida reducida da 20 a 10 onns – suenter 10 onns èsi pia pussibel da vender u dar a fit la nova chasa. Il proxim pass saja uss d'examinar tut questas annunzias e da preschentar al chantun il project da dischlocaziun.
Planisada è ina nova zona da bajegiar a Vazerol ch'è situada gist sper Brinzauls e ch'è il lieu il pli attractiv per abitantas ed abitants da dischlocar. Sche tut va sco giavischà, lura pon els cumenzar a planisar ed a repartir las parcellas il pli baud en in onn. E l'emprima chasa stess, en il cas il pli svelt, l'onn 2029.
