Anc adina dettia quai tensiuns sin ils binaris, uschia che quels stoppian regularmain vegnir tagliads, declera Christian Florin, il schef infrastructura da la Viafier retica.
Il tunnel da drenascha ch'è parzialmain en funcziun haja bain gì in effect positiv sin ils binaris – il mantegniment dal traject tranter Surava e Casti chaschunia però anc adina radund 2'700 uras lavur da mantegniment ad onn. Quai chaschunia custs da 250’000 fin 500’000 francs, di Florin.
I dettia era uschenumnadas sbuvadas secundaras che chaschunian blera lavur vi dals binaris. Actualmain examinescha la Viafier retica la construcziun da pitgas sut ils binaris per stabilisar quels. Las pitgas duain vegnir installadas la stad.
Uschia duai esser pussaivel da puspè augmentar la sveltezza da 30 sin 40 kilometers per ura. La finamira a lunga vista saja da cuntanscher 50 kilometers per ura.
Pli pauc mantegniment vi da vias en conturn da Brinzauls
Las vias tranter Casti – Surava e Casti – Vazarouls dovran actualmain pli pauc mantegniment che fin qua. Sco quai che Josef Kurath da l’Uffizi da construcziun bassa ha ditg, sajan las defurmaziuns vi da las vias idas enavos. Quai haja da far cun ils moviments da la bova che sajan ids enavos.
Ils moviments èn surtut ids enavos pervi dal tunnel da drenascha che vegn il mument construì ed è gia parzialmain en funcziun. Questa stad dettia sanaziuns vi da la via giun val, ha ditg Kurath vinavant.
Vias restan ina sfida
Actualmain averta è ina via da Brinzauls – Vazarouls. Quella po vegnir duvrada mo dad indigens e possessurs da segundas abitaziuns a Brinzauls, sco era da l’auto da posta. Tut ils auters ston far il sviament sur Casti – Surava, per vegnir a Brinzauls. En l'avegnir duai puspè dar ina soluziun per tuts che vulan ir da Lantsch – Brinzauls.
Sco alternativa per la via ch'è sutterrada cun crappa, dettia quai diversas variantas. Ina saja da guntgir la crappa e da duvrar la via existenta fin a Lantsch, in'autra idea saja da far ina via pli largia sur Vazarouls. Ma actualmain na sajan quellas mesiras betg pussaivlas, perquai che la zona da prievel stuessi l'emprim vegnir schliada, uschia Kurath.