L'uschenumnà «Hotsch-Rennen» a Claustra ha gia tradiziun – dapi 19 onns organisescha la destinaziun Tavau Claustra quest eveniment. Il pled «Hotsch» è dialect dal Partenz e munta purschè. L'idea d'organisar ina tala cursa da purschels è naschida ensemen cun il bain puril Kessler da Claustra.
Igl era sa tschentà la dumonda: Co pon ins far in bainvegni da Bumaun a moda in pau pli impressiunanta che simplamain cun in pled? Ils purschels èn portafortunas ed uschia pudain nus giavischar a tut ils indigens ed als giasts buna fortuna per l'onn nov.
Sper la cursa datti in apero da la vischnanca: i dat paun cun paira, croccants e Röteli – survì da las dunnas da l'uniun da gimnastica ch'èn mascradas sco spazzachaminas. Blers stans porschan bavrondas ed insatge da mangiar.
Tranter ils tschintg percurs da la cursa accumpogna musica tradiziunala u l'uniun da giuventetgna cun in concert da plumpas l'occur renza amez il vitg da Claustra, sin plazza da la staziun.
Usit da Bumaun a Claustra
-
Bild 1 von 7. La «Hotsch-Tombola» è il magnet dal public. Per mintga percurs po vegnir scumess sin in purschè, i dat tschintg percurs. A la fin da l'occurrenza vegn tratg la sort tranter quels e quellas che han mess sin il dretg. Bildquelle: RTR.
-
Bild 2 von 7. Intginas dunnas – mascradas sco spazzachaminas – han provedì il public cun Röteli durant l'occurenza. Bildquelle: RTR.
-
Bild 3 von 7. Cunter saira ha la cumpagnia da mats da Claustra anc dà in concert da plumpas. Bildquelle: RTR.
-
Bild 4 von 7. Il pur Thomas Kessler declera co ch'el ha trenà ils purschels per lur grond di da cursa. Bildquelle: RTR.
-
Bild 5 von 7. Manuela Reichenwallner, Dominic Heeb e Sabrina Liesch (da sanester a dretg) èn ina part dal comité d'organisaziun da l'occurrenza da Bumaun a Claustra. Bildquelle: RTR.
-
Bild 6 von 7. L'arrivada da la cursa e la pajaglia per ils purschels: in parsepen ch'è lura emplenì cun pavel per ils animals. Bildquelle: RTR.
-
Bild 7 von 7. Ils purschels turnan a la partenza suenter in dals percurs. Bildquelle: RTR.
Damai che la naiv ha quest onn er mancà en il vitg da Claustra, ha quella stuì vegnir transportada sin la plazza cun camiuns ed agid da lavurers communals. Fin che la pista da cursa stettia, quai saja la gronda lavur, sco Dominik Heeb dal biro da turissem ha ditg.
Späcki Chan, Sau Lee u Öfeli – tgi fa la cursa?
10 purschels curran durant tschintg percurs in cunter l'auter. Mintga purschè porta in dress da cursa d'ina autra colur. Uschia ha Späcki Chan quella giada purtà in dress cotschen, Sau Lee in rosa ed Öfeli in grisch. L'entira cursa vegn filmada e transmessa directamain. Späcki Chan en cotschen porta perfin ina camera si dies.
Cun in zichel fortuna po il public gudagnar in premi da tombola a la fin da la saira. Là vegn tratg la sort tranter tut ils victurs per ils premis da tombola. Per mintgin dals tschintg percurs han tuts la pussaivladad da scumetter sin in dals purschels – cun cumprar in bon da la colur dal dress dal purschellin.
Tgi che pensa ch'ils portgs filan sco rachetas or da las chistas da partenza, lez fa il quint senza ils animals. La partenza è mintgamai plitost patgifica. Il pur Thomas Kessler chamina davant ils purschels cun ina plumpa. Uschia haja el trenà cun ils purschellins durant in mais - mintgamai trais giadas per di. A l'arrivada spetga alura mintga giada in parsepen emplenì sin ils portgs da cursa.
Suenter in percurs da trenament datti quatter percurs e la finala in percurs final. Per quel èn Öfeli, Büeli, Küenzli ed il victur da l'onn passà sa qualifitgads. Fatg la cursa ha la fin finala Büeli cun il numer 9.