Il campiunadi grischun da troccas è in eveniment sin quel che blers e bleras sa legran già lunsch ordavant. El ha lieu adina il cumanzament da l'onn en in auter vitg da la Surselva. Gia la damaun las otg vegnan tuts en da porta cun in surrir e plain motivaziun da dar troccas – e cun ina finamira – da savair ir a chasa cun il pocal.
Dar troccas tegn giuven perquai ch'ins sto studegiar e tegnair endament bler – igl è in trenament per il tscharvè.
Ils blers che dattan troccas han emprais quai gia da giuven en famiglia e dattan adina puspè dapi onns. Uschia è era la gronda part dal giugaders e da las giugadras plitost dad ina generaziun pli veglia. Tuttina entaup'ins adina puspè era fatschas fitg giuvnas vi da las maisas. Uschia per exempel Sara Norina Bearth ed Elena Candinas ch'èn omaduas 20 onns veglias, e che prendan part gia per la quarta giada al campiunadi.
Dar troccas n'è betg mo dar troccas
Il gieu ed uschia era il campiunadi mainan ensemen mintg'onn ina massa da persunas per star en cuminanza. Quai ha era auters avantatgs, per exempel ch'il rumantsch daventa era visibel per persunas che discurran tudestg. Uschia han era prendì part persunas che na san sezzas betg rumantsch – ma han emprais tscherts pleds e frasas per pudair dar troccas. Vitus Dermont che dat curs da troccas di, ch'adina puspè vegnan persunas tudestgas tar el e vulan emprender a dar troccas. E che blers fetschian suenter grad era in curs da rumantsch, perquai che la lingua als plascha.
Jau sun vegnida ad enconuscher mes um en in curs da dar troccas.
Era l'amur san ins chattar cun dar troccas. Uschia era tar Laura Jemmi. Avant 14 onns ha ella prendì part ad in curs per emprender a dar troccas. Là è ella lura vegnida ad enconuscher il figl dal magister che studegiava era a Turitg. Là han ins alura cumenzà a giugar troccas – ed uschia è lura capità ch'elds èn vegnids ensemen ed èn uss maridads. L'onn passà è lura stà il highlight: els dus èn vegnids campiun e campiunessa da troccas da l'onn 2025.
Impressiuns dal campiunadi da troccas
-
Bild 1 von 11. 76 persunas èn s'annunziadas per il campiunadi. Bildquelle: RTR.
-
Bild 2 von 11. In gieu da troccas intensiv. Bildquelle: RTR.
-
Bild 3 von 11. Suenter mintga gieu vegnan nudads precis ils puncts. Bildquelle: RTR.
-
Bild 4 von 11. Da l'ina hai dà ina pausa da giantar – avant chi va enavant cun il turnier. Bildquelle: RTR.
-
Bild 5 von 11. L'uniun da dunnas Schluein ha guardà cha tuts èn fits e sadulads. Bildquelle: RTR.
-
Bild 6 von 11. La maisa dals profis: Laura Jemmi gioga ensemen cun ses um Rest Giacun Dermont (visavi), encunter Vitus Dermont ch'è en gruppa cun Sebastian Camathias (davant a sanestra). Els tuts èn gia stads campiuns da troccas, Laura e Rest Giacun gist l'onn passà. Bildquelle: RTR.
-
Bild 7 von 11. Las reglas dal gieu èn pendidas si en tut la halla. Bildquelle: RTR.
-
Bild 8 von 11. L'emprim rang gudogna 800 francs, il segund 600 francs ed il terz 400 francs. Bildquelle: RTR.
-
Bild 9 von 11. ... ed era quels che na vegnan betg sin il podest survegnan insatge. Bildquelle: RTR.
-
Bild 10 von 11. Il pocal dal campiunadi grischun da troccas. Bildquelle: RTR.
-
Bild 11 von 11. I vegn giugà intensivamain per il podest. Bildquelle: RTR.
Il di è tactà tras cun quatter gieus la damaun, ina pausa da mezdi dad in'ura, ed alura anc ina giada quatter gieus. Suenter quels datti lura tschaina – e suenter quella seguan ils quartfinals, ils mezfinals ed il final. Enfin la saira tard è vegnì giugà per il podest, e pir curt avant las 23:00 èsi lura stà temp per la rangaziun dals victurs.
