«Dai o vinavon», di Leandro Riedi. El sesa en stiva a Disla/Mustér en la chasa paterna da ses bab. Ensemen cun lez, l'aug e la tatta dat l'um da 23 onns troccas. Per in di ha el mess da la vart la palutta da tennis. El sa legra da passentar temp cun sia parentella. Troccas n'ha el gia ditg betg pli giugà – emblidà n'ha el dentant nagut. Era betg il tschantschar e sdiavlar che tutga tiers.
Troccas è mes gieu da chartas preferì. Jau na discur betg bler rumantsch, ma i basta per giugar troccas.
Quest onn è Leandro Riedi sa qualifitgà per l'emprima giada per il tableau principal dal pli renumà turnier da tennis dal mund – quel sin il pastget verd: Wimbledon. Suenter l'emprima runda è il turnier dentant gia stà a fin per el
Paucas emnas pli tard ha Riedi lura procurà per la gronda surpraisa a l'US Open, è quai in dals pli gronds turniers dal mund. Sco qualifitgant ha el cuntaschì l'otgavelfinal. «Jau hai dumagnà quai ch'jau hai adina giavischà. Suenter mias blessuras n'avess jau mai pensà che quai saja pussaivel quest onn.»
Crudà en la fora
Suenter ses grond success en ils Stadis Unids da l'America è el crudà en ina fora. Il motiv: in'ulteriura blessura. L'october ha el stuì laschar operar la glista. Suenter las duas operaziuns vid il schanugl è quai stà la terza operaziun entaifer 13 mais. El ha pers la motivaziun dal tuttafatg.
Jau na vuleva betg pli discurrer sur da tennis. La motivaziun era davent. Quai è stà in fitg grev mument en mia carriera.
Suenter in mais è el sa revegnì da la fora mentala. Grazia a la fisioterapia ha el fatg spert progress – uss trenescha el puspè quasi mintga di. En paucas emnas sgola Leandro Riedi en l'Australia als proxims turniers da tennis. La finamira è da betg sa blessar per pudair mussar ses potenzial. «Mes siemi è da gudagnar ina giada in turnier da Grand slam».