La Grischuna Simona Waltert tutga l'emprima giada en sia carriera tar las meglras 100 giugadras da tennis da l'entir mund. En la glista da rangaziun mundiala è l'atleta da Cuira da 24 onns sin plazza 98. Ella è l'emprima Grischuna che dumogna quest pass.
Merità quest sigl en las Top 100 ha la dunna da 24 onns suenter sia victoria tar il turnier d'ITF avant duas emnas a Lissabon. Plinavant ha ella cuntanschì ils quartfinals en il turnier da Challenger en l'Italia.
En il sport da tennis è questa marca dals Top 100 ina marca ch'ins ha en il tgau. Ch'jau hai uss dumagnà questa finamira è insatge mega cool.
Il 2023 è Simona Waltert sa qualifitgada per l'emprima giada per in turnier da Grand Slam, numnadamain per il French Open a Paris. Ils ultims onns ha ella lura bain fatg in pass enavant, la gronda constanza ha dentant savens mancà da far il pass en ils top 100. Quest onn è quai sa midà. Ella haja fatg in svilup mentalmain sco er fisicamain, manegia ella. La paja è uss dad esser ina da las 100 meglras giugadras da tennis dal mund. E là vul ella era restar. Sche Simona Waltert discurra d'ulteriuras finamiras, sche lura discurra ella er gugent dals quatter Grand Slams. La finamira saja da pudair s'etablir en ils turniers da Grand Slam.
Uschia è sia proxima gronda finamira dad esser en il tableau per l'emprim Grand Slam il 2026, quai ch'è l'Australian Open a Melbourne. Fin oz n'è ella anc mai sa qualifitgada per quest turnier.
Duas giadas en ils Top 100
Betg mo sco giugadura singula, mabain er en il dubel è Simona Waltert da chattar en ils Top 100. Là actualmain sin plazza 91.
Quai n'era betg ina da las finamiras principalas quest'onn. Ma jau hai ditg ch'jau dess gugent dapli dubel quest'onn, cunquai ch'jau hai adina dà gugent dubel.
Tant en singul sco er en il dubel tranter las Top 100? Quai pon mo 35 giugadras en l'entir mund pretender actualmain. E nagina autra Svizra. La gronda part da las collegas da Swiss Tennis mettan pitschen u nagin focus sin il dubel.
