Il Grischun publitgescha ussa tuttina las cunvegnas ch'il chantun aveva fatg il 2019 cun las firmas inculpadas en il cartel da construcziun. En quels accumodaments han 15 impressaris dal Grischun dal nord e dal sid consentì ad in pajament da 9 milliuns francs per evitar ina persecuziun penala.
Daners ch'èn stads destinads per il chantun ed 82 vischnancas donnegiadas tras las cunvegnas da pretschs illegalas. Sco quai ch'il chantun communitgescha han las interpresas era consentì dad introducir programs da compliance, e garantir da respectar il dretg da cartel en l'avegnir. Il chantun publitgescha ils accumodaments sin basa d'ina dumonda d'in schurnalist dad SRF – e suenter examinaziun da la Dretgira superiura.
Grischun en rolla da piunier
L'affera ha er gì ulteriuras consequenzas politicas e giuridicas. La cumissiun da concurrenza (WEKO) aveva gia avant constatà pliras cuntravenziuns cunter il dretg da cartel tranter il 2004 ed il 2012 e sancziunà diversas firmas. Il scandal ha plinavant manà ad ina cumissiun parlamentara d'inquisiziun (PUK) ch'ha intercurì ils andaments en la branscha da construcziun e preschentà il 2021 ses rapport.
Tenor il chantun ha il Grischun cun quest agir gì ina rolla da piunier en l'entira Svizra. Per l'emprima giada saja reussì da far valair pretensiuns d'indemnisaziun e da cuntanscher pajaments voluntaris da las interpresas. Quests pajaments èn pli tard tar sancziuns vegnids resguardads en moda mitigionda. La publicaziun dals documents è dentant stada giuridicamain dispitaivla: pervi da differents interess publics e privats han ins stuì sclerir tge cuntegns che dastgan vegnir communitgads. Perquai èn parts dals contracts vegnidas anonimisadas.