Avant passa 10 onns è il cartel da las interpresas da construcziun en l'Engiadina vegnì scuvrì. 12 interpresas da construcziun han, durant onns, discurrì davart offertas e proponì pretschs memia auts – sin donn e cust dal chantun e da las vischnancas. In scandal, sin il qual il chantun ha reagì: ins ha elavurà, rapportà ed er sensibilisà.
Uschia era glindesdi, cura che la Cumissiun da concurrenza (WEKO) ha, ensemen cun il chantun, envidà persunas che lavuran per il maun public ad in suentermezdi d'infurmaziun a Cuira.
In indizi è per exempel duas offertas cun exact il medem pretsch. In auter è che las medemas interpresas gudognan mintg'onn la concurrenza.
Finamira: Sensibilisar per la tematica. Cunzunt impurtant è d'identifitgar offertas dubiusas.
Il chantun Grischun è spezialmain periclità – daco?
Sco Orlando Nigg, manader dal post da cumpetenza per las acquisiziuns dal chantun, declera, haja quai plirs motivs.
Per l'ina las distanzas geograficas che giogan ina rolla e per l'autra haja quai era da far cun il fatg ch'i dettia mo paucs furniturs en las regiuns. La concurrenza saja pli pitschna e quai augmentia il ristg per cunvegnas da pretsch.
Dapi l'onn 2022 datti l’obligaziun d’annunziar cas dubius
Blers cas da cunvegnas da submissiun na vegnian betg inoltrads al chantun, di Orlando Nigg. E tuttina haja l'obligaziun d'annunziar cas ch'è vegnida introducida l'onn 2022 in effect positiv.
Blers collavuraturs e bleras collavuraturas dal maun public èn vegnids pertscherts da questa tematica.
La realitad è in ziv in'autra
Sin palpiri tuna quai tut bain – la realitad è dentant in zic in'autra. Quai vegn spert cler sch'ins discurra cun persunas ch'han mintgadi da surdar lavurs, surtut en las regiuns. I vegnia anc adina discurrì – las offertas vegnan anc adina coordinadas.
Las cunvegnas èn donnegiusas en blers reguards – betg mo per daners da taglia, mabain er per l'innovaziun ed il progress. Perquai sper jau fitg che la situaziun sa megliereschia bainprest.
Betg en las dimensiuns dal scandal en l'Engiadina, dentant tuttina ina realitad ch'ins na po betg ignorar. E tuttina spera Orlando Nigg che las mesiras instradadas portian fritg.