Il Tribunal administrativ federal ha refusà essenzialmain ils recurs da trais interpresas da construcziun engiadinaisas cunter la disposiziun da la Weko en connex cun cunvegnas nunlubidas. Sulettamain las sancziuns ha il tribunal reducì.
Il Tribunal administrativ federal è vegnì a la conclusiun ch'igl existiva dapi il pli tard l'onn 1997 in consens tranter las interpresas da construcziun en l'Engiadina Bassa, per fixar tgi che survegna l'incumbensa e fixar ils pretschs da purschida respectivs.
Fatg part da quel han la gruppa da recurrents Foffa Conrad, la Lazzarini SA e la Resgia Koch SA. Plinavant conferma la dretgira ch'igl haja dà dapi il pli tard l'onn 2008 fin l'october 2012 ina cunvegna bilaterala tranter interpresas da la gruppa Foffa Conrad e Lazzarini per coordinar il cumportament sin il martgà. I sa tractia da cuntravenziuns gravantas cunter il dretg da cartel che stoppian vegnir sancziunadas directamain.
Sancziuns pli bassas
Ils imports da sancziun ha la dretgira reducì en differentas dimensiun envers la disposiziun da la Weko dal mars 2018.
La gruppa Foffa Conrad vegn sancziunada cun radund 2,5 milliuns francs enstagl da bunamain 5 milliuns francs. Tar la gruppa Foffa Conrad ha la dretgira valità pli ferm che la Weko ch'ella ha denunzià sa sezza e gidà a scuvrir il cas. Ultra da quai deducescha ella qua in pajament d'enclegientscha envers il chantun Grischun ch'è vegnì pajà suenter che la Weko aveva disponì.
La Lazzarini SA vegn sancziunada cun radund 2 milliuns francs enstagl da radund 2,25 milliuns francs. Concernent la Lazzarini resguarda la dretgira il fatg che la firma haja tradì il proceder tar la cunvegna bilaterala.
La Resgia Koch vegn sancziunada cun radund 185'000 francs enstagl da radund 250'000 francs. Tar la Resgia Koch saja decisiv che la participaziun a radunanzas preliminaras possia vegnir cumprovada pir a partir da l’onn 2006 e che las cuntravenziuns sa mussian tar pliras cunvegnas singulas in pau main gravantas.
Las sentenzias pon vegnir contestadas tar il Tribunal federal.
