Suenter 14 onns che la cumissiun da concurrenza (Weko) ha instradà las inquisiziuns cunter 19 interpresas da construcziun da l’Engiadina Bassa en connex cun cunvegnas da pretschs, po il cas finalmain vegnir mess ad acta. La Dretgira federala ha tenor ina communicaziun da medias numnadamain refusà il recurs da las trais interpresas da construcziun involvidas, la gruppa Foffa Conrad, la Lazzarini SA e la Koch SA Ramosch.
Success per la Weko
Che la Dretgira federala haja uss finalmain dà raschun en chaussa cartel da construcziun Engiadina Bassa saja in fatg ordvart legraivel per la cumissiun da concurrenza. «Quai è stà in lung viadi fin qua. I sa tracta qua numnadamain dal pli grond cas da cunvegnas da pretschs en il sectur d’acquisiziun che nus avain scuvert fin uss. Nus essan oravant tut satisfatgs ch'i vegn danovamain confermà en la sentenzia che las cunvegnas da pretschs sajan vegnidas fatgas a moda sistematica ed intenziunada», declera il vicedirectur e manader da la secziun da fabrica Weko, Frank Stüssi sin dumonda da la FMR ed agiunta: «In punct ch'è adina puspè vegnì contestà da tschertas interpresas involvidas».
Quai è stà in lung viadi fin qua.
Multas da milliuns
Questa sentenzia è uss definitiva. Uschia ch'igl è uss cler che la gruppa Foffa Conrad ha da pajar in chasti da passa 2,4 milliuns francs, la Lazzarini SA in da passa 2 milliuns francs e la Koch SA Ramosch in da passa 180'000 francs. Quai suenter che questas trais interpresas avevan en consequenza a las sancziuns da la Weko dal 2018 fatg recurs. L'emprim davant Dretgira administrativa federala e lura davant Dretgira federala. Er sche la Dretgira administrativa federala aveva sbassà il 2023 las sancziuns da la Weko per las interpresas involvidas, è il recurs vegnì inoltrà, tant da la Dretgira administrativa federala sco er uss da la Dretgira federala.
Nus essan trumpads da la decisiun.
Ch'ins haja prendì per enconuschientscha la sentenzia, haja gì num sin dumonda tar la gruppa Foffa Conrad. Prender posiziun en chaussa na vul la firma dentant betg. Sumegliant tuna quai er tar la Koch SA Ramosch. Qua agiunta Jachen Andrighetti, commember da la direcziun e cussegl administrativ da l’interpresa: «Davart la sentenzia sun jau vegnì a savair or da la communicaziun da pressa, perquai na vuless jau er betg prender posiziun en chaussa. Quai ch’jau poss dentant dir – e qua discurra unicamain per noss’interpresa – nus essan trumpads da la decisiun. Quai damai che nus essan persvas d'esser en il dretg. Uschiglio n'avessan nus betg fatg quest pass sa chapescha.»
Ina decisiun da gronda impurtanza
Er sche la Dretgira federala sa tegna vi da l'autezza da las sancziuns, vul dir pli bassas ch'il chasti che la Weko aveva oriundamain imponì, n'ha quai nagina influenza sin il fatg che questa sentenzia saja in success tras e tras per la lavur da la Weko. «Era sche nus essan da l’opiniun che las sancziuns avessan stuì esser pli autas, èsi il medem mument da dir che sancziuns duain er adina avair in effect preventiv», uschia Frank Stüssi vinavant, «quai na va betg mo per l’ autezza sco tala da las sancziuns.»
Pli impurtant saja oramai il fatg che la sentenzia da la Dretgira federala vegnia a la medema conclusiun sco la Weko, numnadamain ch'i saja vegnì fatg sapientivamain abus cunter il dretg da cartel e quai sur plirs onns. E ch'il fatg che questa decisiun da la Dretgira federala saja vegnida prendida d'in gremi da tschintg persunas mussa la finala er l'impurtanza dal cas. «Sche tschintg persunas tractan in tal cas, vul quai dir ch’ins prenda la situaziun fitg serius. E qua pon ins ir da quai anora che questa decisiun è ina decisiun directiva cun consequenzas er per auters cas giuridics en l'avegnir.»
E tals cas èn anc pendents tar la Weko, tant en il Grischun sco er en auters lieus en Svizra.
Remartga da la redacziun: Fin la fin da redacziun da la Quotidiana n'èsi betg stà pussaivel da survegnir ina posiziun en chaussa da l'interpresa Lazzarini SA.