La cumissiun da concurrenza (Weko) extenda danovamain l'inquisiziun cunter cunvegnas da submissiun supponidas en il sectur da construcziun en la regiun Moesa. Avert quella han ins gia l'onn 2020 cunter trais interpresas da construcziun, in'emprima extensiun sin lura sis interpresas è succedida in onn pli tard.
Examinaziun danovamain avert cun novs suspects
Suenter che la procedura avess atgnamain duì vegnir terminada l'atun passà 2025, haja la Weko survegnì novas infurmaziuns d'ina interpresa, uschia la communicaziun da la gievgia. Cun las investigaziuns ch'èn puspè vegnidas reprendidas èn resultads indizis per ulteriuras cunvegnas, uschia che la procedura vegn uss extendida sin total nov interpresas.
Da nov vegnidas integradas en las investigaziuns èn tenor il vicedirectur da la Weko Frank Stüssi trais interpresas cun sedia en la part sura da la regiun da la Moesa.
La procedura vegnia uss probabel a sa prolungar per in onn. Stüssi declera envers Keystone-SDA, ch'igl è gia capità en il passà repetidamain che la Weko haja extendì las inquisiziuns sin ulteriuras interpresas. Quai per exempel tar inquisiziuns gia terminadas en il Grischun u er en il connex cun inquisiziuns anc en curs en ils chantuns Neuschatel e Giura.
Questa procedura cuzza pli ditg che usità.
«Dentant è la durada da questa procedura pli lunga che usità.», ha ditg Stüssi. Pli ditg giaja tranter auter, sch'il fatg ch'è d'eruir saja cumplex u grond.
Concret èn tenor Stüssi duradas da procedura d'en media dus fin trais onns usitadas. Questa procedura qua avant maun dura percunter gia sis onns e fin la finiziun bain set onns.
Cunvegnas da submissiun èn cunvegnas ch'èn scumandadas tenor il dretg da cartel tranter concurrents a chaschun da submissiuns, nua ch'i vegnan concludids tranter els pretschs, cundiziuns u retschaviders d'incumbensas. Ellas sclaudan il martgà fair e pon manar a pretschs pli auts.