En ina chasa da trais plauns serva l’Engiadinaisa cafés a schefs d’ina firma internaziunala che han prendì a fit ina chasa a la promenada da Tavau. Là fan quels lur inscunters e tut il temp van en ed ora persunas. Marianna Bott sto guardar ch’els ed ellas stettian bain, ed hajan in café tenor gust sin maisa; tgi vul cun latg chaud, tgi cun latg fraid e tgi in café da filter e tgi in normal. Ils giavischs èn vasts, dentant Marianna Bott accumplescha tuts.
Era quels che nus na vegnin betg d’accumplir empruvainsa tuttina d’accumplir.
Il giast è il retg u la regina tar Marianna Bott.
La firma da catering porscha era da mangiar. Sin trais plauns da la chasa a Tavau è la firma s’installada. Sin il plan nua che Marianna Bott lavura datti be da baiver.
Jau hai en sasez la lavur da tschigulatta, l’etascha dals schefs nua ch’i dat be da baiver.
Ina visita en cuschina fa l’Engiadinaisa ch'è per la segunda giada per lavurar al WEF tuttina fitg gugent. Il cuschinunz sa ch’ella ha gugent quai ch’el cuschina, ed uschia po ella adina puspè degustar las buccadinas che vegnan preparadas. Era ils tschigulattins stoppian mintgatant vegnir degustads, di Marianna Bott cun in rir.
L’atmosfera en la chasa è ina fitg agreabla e positiva. I saja era d’engraziar al team da catering che dat tut per pudair far ina buna lavur. Ed era ils clients han gugent Marianna Bott ch'è adina en la luna per far in skerzin entamez ils discurs serius che vegnan fatgs al WEF.
