Actualmain ha la firma austriaca Pfeifer ils dretgs correspundents d'elavurar e resgiar laina ch'èn definads en il contract e planisaziun dal territori, enfin almain il 2027. Quai ha il secretari dal departament d'economia confermà en in rapport da RTR l'avrigl avant trais onns.
Davos las culissas èn ins dentant gia ussa vi da giavischs, ideas e projects per nizzegiar l'areal a Domat. Cun la resgia «resurses» hajan ins fatg in emprim pass per la chadaina da lain grischuna, ha ditg Ruedi Walli envers RTR. L'anteriur comember da l'associaziun lain grischun e president dal cussegl d'administraziun da la firma en purtenza enconuscha fitg bain la branscha.
El saja bain stà l'entschatta in sustegnider d'ina resgia gronda a Domat, dentant er cun ina tscherta sceptica. Ussa saja el persvadì dal model cun trais resgias pli grondas en las regiuns ed in lieu da producziun a Domat.
Resgia surmirana sco motor
Cun bunamain 90% dal lain grischun che vegn il mument exportà enstagl vegnir nizzegià en la regiun èsi stà temp per midar insatge. La nova resgia regiunala «resurses» fa frunt a quella tendenza. La resgia duai ina giada elavurar fin 70'000 meters cubic laina. Ina summa ambiziusa, ma pussaivla. Il mument sajan ins fitg bain sin via, conferma Gian Andri Capeder, il mainafatschenta sin dumonda dad RTR.
La visiun da «resurses» na duai dentant betg esser a fin qua, la finamira saja ch’i vegnia a partir dal 2025 en l’entir Grischun sulettamain elavurà laina grischuna. Plans per duas ulteriuras resgias regiunalas en il Grischun èn gia sin maisa. L'iniziant dal project Enrico Uffer di ch'els hajan buns contacts cun la selvicultura e cun ils partenaris. Els sajan persvas ch'els hajan avunda laina e ch'i dettia ina buna collavuraziun, uschia che tuts possian profitar.
Il proxim element da la chadaina
Per elavurar en in segund pass la laina resgiada a Tinizong, vuless l'interpresa gugent vegnir a Domat. Quai n'è dentant betg pussaivel: La planisaziun dal territori e las prescripziuns dal plan d'areal na lubeschan betg in'elavuraziun al lieu.
Là sto dentant vegnir construì ina resgia gronda cun capacitad da 300'000 cubics – in'utilisaziun mo per elavurar laina, n'è tenor la planisaziun locala e las prescripziuns dal plan d'areal betg pussaivla. Quai conferma Bruno Maranta, il secretari dal Departament d'economia dal Grischun.
Plinavant ha il chantun il pli baud l'onn 2027 la pussaivladad da cumprar las opziuns da la firma Pfeifer ch'ha il dretg da construir en il vest ina resgia gronda cun elavuraziun da lain (sin ina surfatscha da prest 8 hectaras).
Or da l'archiv: