Chantautur, artist e pionier - Paulin Nuotclà è mort en la vegliadetgna da 74 onns

Il chantautur, artist e pionier rumantsch Paulin Nuotclà è mort en la vegliadetgna da 74 onns a Susch. Quai ha confermà sia famiglia envers RTR.

Paulin Nuotclà è naschì a Ftan Baraigla. Ina segunda staziun da si'infanzia è stada Preda. Pli tard è la famiglia Nuotclà lura ida a star a Samedan, nua che Paulin Nuotclà ha lura era frequentà la scola. Suenter ses temp da scola ha el fatg la scola d'art a Basilea ed è era sa fatschentà cun la lingua rumantscha en differentas spartas, tranter auter era cun scriver texts per atgnas chanzuns. Nuotclà vala sco pionier dal rock rumantsch. Chanzuns sco «Engiadina» u «Il prüm milliun» èn classichers da la Rumantschia ch'ina a scadin enconuschan.

Dal 1976 fin il 1989 ha Paulin Nuotclà creà mintga mais in comic, quels carnets èn spert daventads cult tar grond e pitschen. Cun sia mort perda la scena culturala rumantscha ina vusch marcanta ed in artist multifar.

Chantautur ed artist

Paulin Nuotclà tutgava tar las vuschs marcantas da la scena da chantauturs rumantschs. En sias chanzuns ha el cumbinà texts poetics cun melodias captivantas, fatg palpablas istorgias persunalas, sco era express critica envers da la societad. Sia musica è fermamain enragischada en la lingua e cultura rumantscha e quai senza perder l'actualitad.

Cun sia moda ruassaivla ed autentica e ses texts plain vardads ha Nuotclà cuntanschì in public lunsch sur ils cunfins linguistics e mussà quant viva e variada che la scena da musica rumantscha è.

Sper sia musica ha Paulin Nuotclà era mussà in grond talent artistic. En ses comics e sgrafits cumbinava el umor fin cun in'egliada per detagls e scenas dal mintgadi.

Impressiuns da si'exposiziun 2024

Cun questas ovras visualas ha el cumplettà sia lavur musicala e cumprovà ch'el saveva raquintar istorgias a moda impressiunanta betg mo en chanzuns, mabain era en maletgs.

Ovras per l'eternitad

Saja quai en sias chanzuns, ses dissegns u ils sgrafits: Paulin Nuotclà ha laschà enavos in'ovra che dura sur il mument ora. Sias lavurs raquintan da l'identitad, dal mintgadi e da la patria – e mantegnan uschia mintgamai in toc cultura rumantscha. Els restan sco accumpagnaders silenzius e regordan ad in artist che ha laschà enavos fastizs cun pleds e maletgs.