Siglir tar il cuntegn

Header

video
Coronavirus: Turistichers han discutà cun il Cussegl federal
Or da Telesguard dals 27.04.2020.
laschar ir. Durada: 3 minutas 15 Secundas.
cuntegn

Branscha turistica Lev optimissem per stagiun da stad

La hotellaria fa squitsch! En ina brev averta ch'è vegnida publitgada l’emna passada en differentas gasettas quotidianas, ha la branscha da turissem svizra pretendì ina strategia dad exit concreta dal Cussegl federal.

Ensemen cun il minister d’economia Guy Parmalin e cun il minister da sanadad Alain Berset ha Simonetta Sommaruga envidà ils represchentants da la branscha da turissem ad in barat d’ideas. Il Cussegl federal vul oravant tut discutar e sclerir cun las associaziuns las aspectativas. Finamira da quest inscunter suprem da turissem saja stà da definir las pussibilitads da las purschidas da vacanzas en il proxim temp.

Representanten der Branche am Tourismusgipfel in Bern.
Legenda: Represchentants da la branscha da turissem a l'inscunter a Berna. RTR

Discurs constructivs

Andreas Züllig il president da la hotellaria svizra quinta ch’il Cussegl federal communitgeschia gia quest’emna schluccadas da las mesiras per la branscha turistica, sin ils 11 da matg ed ils 8 da zercladur. I saja dentant impurtant ch’ins fetschia uss il pass tenor la chomma e saja precaut – betg ch’i dettia puspè dapli infecziuns.

Il Cussegl federal ha tadlà bain ed ha chapientscha per noss giavischs.
Autur: Andreas Züllig president da la hotellaria svizra
audio
Inscunter turissem – Andreas Züllig vesa l'impurtanza d'avrir pass per pass la purschida
ord Actualitad dals 27.04.2020.
laschar ir. Durada: 2 minutas 57 Secundas.

D'in barat constructiv discurra Svizra Turissem suenter l'inscunter cun il Cussegl federal. E sco la presidenta da la Confederaziun Simonetta Sommaruga ha ditg envers radio SRF, veglia il Cussegl federal che Svizzers e Svizras possian passentar vacanzas bellas e segiras en il pajais. Fin en duas emnas laschian els examinar tge che saja pussaivel en la gastronomia.

Tant ils turistichers sco er il Cussegl federal èn conscients che la stad saja in temp impurtant per la branscha turistica. Vitiers dovria la populaziun ina perspectiva.

Levgiament suenter l'inscunter

Era Leonie Liesch, la presidenta dals managers da turissem, è levgiada suenter l’inscunter cun il Cussegl federal.

Noss giavisch è segirtad da planisaziun
Autur: Leonie Liesch presidenta dals managers da turissem
audio
Inscunter turissem – Leonie Liesch è cuntenta ch'il turissem vegn prendì serius dal Cussegl federal
ord Actualitad dals 27.04.2020.
laschar ir. Durada: 2 minutas 41 Secundas.

I saja impurtant da savair cura che las purschidas turisticas avrian. Lura possian ins era communitgar quai als giasts. E cun ina buna communicaziun possian ins era procurar ch’i na dettia betg fullas da giasts.

Fitg positiv è ch’il Cussegl federal s’engascha che nus possian lantschar ina stagiun da stad
Autur: Leonie Liesch presidenta dals managers da turissem

RTR actualitad 06:00

Artitgels legids il pli savens