La malsegirtad per ils campadis grischuns è stada gronda. In pulit temp n'èsi betg stà cler, cura ch'els pon puspè avrir lur manaschis. Il matg ha il Cussegl federal dentant schluccà las mesiras ed ils campadis han l'entschatta zercladur pudì beneventar ils emprims giasts...
...e dapi lura èsi marschà sin ils campadis grischuns ti mordio, e quai sur tut las regiuns ora. Grazia u pervia dal coronavirus èn bleras Svizras e Svizzers sa decidids da passentar las vacanzas en la patria:
Fin avant duas emnas eran 95% dals giasts ord la Svizra.
Cunzunt blers Romands han chattà la via sin il campadi.
Campadis dal TCS cun plus da 45%
Ils tschintg campadis che appartegnan al TCS (Mustér, Tusaun, Samedan, Scuol e San Murezzan) han pudì notar tranter schaner e fin fanadur 2020 quasi la mesadad pernottaziuns dapli ch e durant il medem temp da l'onn passà:
Ils 6 da zercladur avain nus pudì avrir suenter il lockdown ed a partir da là essan nus stads adina quasi u dal tut occupads.
Deficits dal lockdown per part gia cumpensads
La fitg buna stad ha uschia pudì schluccar malsegirtads ch'èn sa dadas durant il lockdown. Tuttas plazzas da campadi na vegnian dentant tgunsch betg a pudair cumpensar la sperdita finanziala. Plinavant n'è Covid-19 anc betg svanì ed i saja da spetgar tge che l'atun porta, uschia il manader da turissem dal TCS Oliver Grützner.
Las manadras ed ils manaders dals campadis Samedan, Savognin e Scuol han gia pudì gulivar ils deficits chaschunads dal scumond da sortir. Era ils campadis a Flem, Trun e Cuira han gì ina buna stad, ma dal tuttafatg sajan ins (anc) betg vegnids da gulivar la sperdita da l'emprim mez onn:
Quels bels dis da primavaira cun las festas da Pasca e Tschuncaisma èn passads e na sa laschan betg pli cumpensar.
