Siglir tar il cuntegn

Header

cuntegn

Chamonas e corona Las chamonas speran sin ina buna stad

Suenter ch’il cusseglier federal Ueli Maurer ha fatg l’appel da far vacanzas en Svizra, han era las chamonas en il Grischun sentì ils davos dis in augment da reservaziuns.

Il cusseglier federal Ueli Maurer ha l’emna passada fatg l’appel da far vacanzas da stad en Svizra. Per ils guardiachamonas en il Grischun è quai ina buna novitad. Els speran ch’i vegnia a dar dapli glieud en la natira e las muntognas durant la stad.

Las chamonas sentan in trend

Ursula Hofer da la chamona Lischanna en l’Engiadina Bassa senta dapi circa 10 dis in pitschen trend. Ussa vegnan mintgadi enturn 5 reservaziuns vitiers. Ella sa legra ch’il gust ed interess dals Svizzers crescha. Markus Brot da la chamona Silvretta en la vischinanza da Tavau di ch’i sa tracta il mument surtut da reservaziuns ord la Svizra. Il trend sa mussia dentant.

Era Jill Lucas da la chamona Jenatsch sur Bever è da l’opiniun ch’i dettia ussa in’augment grad pervia da l’appel dad Ueli Maurer. Guardà sur l’entir onn ora dian tuts dentant ch’i haja dà pli paucas reservaziuns cumpareglià cun auters onns.

audio
Corona e chamonas: Betg cler sche tut las reservaziuns valan
ord Actualitad dals 14.05.2020.
laschar ir. Durada: 4 minutas 31 Secundas.

In'occupaziun maximala n’è forsa betg pussaivla

Intgins guardiachamonas fan era quittads ch’els na san betg metter a disposiziun tut ils letgs en las chamonas pervia da la mesira da tegnair distanza. Per exempel smina Toni Trummer da la chamona Piz Terri da stuair reducir il dumber da letgs da sia chamona da 110 sin 50 per ademplir las mesiras. Tut las chamonas prendian dentant vinavant encunter reservaziuns cunquai ch’els hajan anc avunda temp da reagir cunquai che las bleras chamonas avran pir en il zercladur.

Il Club alpin svizzer fa ina prognosa naira

Bruno Lüthi, il manader naziunal dal manaschi da chamonas dal club alpin svizzer (CAS) smina ch’il viandar vegn en sasez ad esser en moda quest onn. Tuttina vegnia a dar in deficit. Cunquai che bleras chamonas na vegnan betg a pudair duvrar tut lur spazi, quinta il CAS cun 130'000 pernottaziuns pli pauc durant la stad.

RTR actualitad 07:00

Artitgels legids il pli savens