Sch'ins survegn sur l'applicaziun da SwissCovid in'annunzia ch'ins ha gì contact cun ina persuna testada positiv sin il virus, han ins pliras pussaivladads co reagir. En l'app chattan ins in numer da telefon da la hotline. Tar quella èsi lura da telefonar e lura vegn evaluà en in discurs sch'i fa senn da laschar far in text da corona – sa chapescha che quai è tut anonim. Da telefonar a la hotline è be ina recumandaziun, ins po er direct ir a laschar testar.
Ils custs per in test sin basa da questa annunzia da l'app, vegnan surpigliads sch'ins mussa l'app cun la novitad dal contact cun ina persuna infectada. Quai er sch'ins n'ha betg telefonà sco emprim a la hotline.
Survegnan ins vinavant la paja?
Sch'ina persuna va senza attest da medi en quarantina ed ins na po betg lavurar en homeoffice, n'è la paja er betg garantida. Sch'insatgi vegn però testà positiv u er sch'ins vegn tramess entras il contact tracing en quarantina, survegnan ins vinavant la paja, er sch'ins na po betg lavurar da chasa anora.
