Siglir tar il cuntegn

Header

cuntegn

Cunvegnas da pretschs Inquisiziun dal cartel vegn pli chara

Las lavurs da la PUK chantunala, la cumissiun parlamentara d'inquisiziun che investighescha il cas da cartel da bajegiar en il Grischun èn pli charas che previsas. Da quai rapporta il schurnal regiunal dal Grischun. Il Cussegl grond duai la proxima emna anc ina giada dauzar il credit per 150'000 francs. Las lavurs finalas vid il rapport d'inquisiziun sajan pli vastas che quintà, scriva la cumissiun da gestiun en sia dumonda al Cussegl grond. Sco quai ch'il president da la PUK, Michael Pfäffli, ha ditg envers il schurnal regiunal, hajan els vesì ch'i dovria tuttina dapli lavurs. Il mument stoppia il rapport anc vegnir verifitgà. Ed er las varga dus tozzels persunas che vegnan numnadas en il rapport pon anc ina giada s'exprimer. Ch'ils custs vegnan anc ina giada talmain pli auts n'hajan els betg pudì prevair a l'entschatta da l'onn, uschia Pfäffli.

I custa il dubel

Las lavurs da la PUK vid il cartel da construcziun vegnan uschia bunamain dubel uschè charas sco previs oriundamain. Gia avant in onn e mez ha la PUK vis, ch'ils 600'000 francs ch'il parlament ha mess a disposiziun na tanschan betg. Ed ha lura dumandà in augment da 350'000 francs. Il rapport ch'è la segunda part da las inquisiziuns ha examinà la dumonda, schebain las autoritads, pia l'administraziun ed er la regenza, hajan agì responsabel en la dumonda da cunvegnas da pretschs.

In'emprima part, quella che ha tractà la dumonda schebain l'arrestaziun da Adam Quadroni saja stada correcta è gia serrada giu.

Per tadlar curt e concis:

audio
PUK dumonda dapli daners
ord Actualitad dals 15.04.2021.
laschar ir. Durada: 1 minuta 18 Secundas.

RTR actualitad 17:00

Artitgels legids il pli savens