- Il concern da construcziun svizzer Implenia vul serrar en Grischun quatter da tschintg lieus. A Cuira resta l'interpresa cun purschida reducida e 20 collavuraturs spezialisads.
- La raschun saja che la fatschenta en Grischun na rendia betg avunda, simplifitgà fitg.
- Pertutgadas èn radund 150 persunas che ston uss temair per lur plazza da lavur.
- Ils sindicats Syna ed Unia pretendan che Implenia desistia da desditgas da plazzas.
La firma da construcziun Implenia serra enfin la fin da l'onn sia sparta da construcziun bassa, da vias e da construcziun auta en il Grischun e cunquai bunamain tut lur staziuns en il chantun. Pertutgadas èn las sedias a Tavau, Zernez, San Murezzan, Segl en Engiadina sco er la gronda part da la sedia a Cuira.
Fatschenta na renda betg
Il concern svizzer numna envers RTR diversas raschuns per quest pass. Simplifitgà fitg, na rendia la fatschenta en Grischun betg per il concern, sco ina pledadra da Implenia ha ditg envers RTR.
En pli hajan er las particularitads dal martgà grischun manà a quest pass: La fatschenta en il chantun saja fitg locala e stagiunala e per gronda part sa tractia be da pitschens projects. En pli dettia en la branscha da construcziun grischuna ina surcapacitad, uschia ch'il squitsch da concurrenza saja grond.
Plan social
L'avegnir da las 150 persunas pertutgadas è anc intschert. Sco Implenia ha ditg envers RTR, duain per part auters impressaris regiunals surpigliar il persunal. I haja gia dà emprims discurs tranter Implenia ed auters impressaris. Er il concern svizzer sez veglia – nua pussaivel – porscher vinavant ina plazza ad ina part dal persunal. Per tgi che perdia la plazza dettia in plan social. Pertutgads da la serrada èn lavurers da construcziun, magasiniers e persunal da biro.
Il persunal saja il mardi a bun'ura vegnì infurmà davart ils plans. Il concern ha instradà in proceder da consultaziun.
Sulet projects gronds en Grischun
Projects d'infrastructura ch'èn gronds e cumplex veglia il concern svizzer far vinavant er en Grischun. Sco Implenia ha ditg envers RTR sajan quai per exempel projects da construcziun da rodaglias u tunnels. Però vegnian quellas lavurs fatgas sur ils posts dador il chantun. Ultra da quai resta il concern a Cuira cun activitads en la construcziun auta – quai per prestaziuns cumplessivas e construcziuns prontas per la consegna. A Cuira restian uschia radund 20 dals 170 collavuraturs che Implenia fatschenta actualmain en Grischun. I sa tractia da persunal fitg qualifitgà e da persunas che lavuran gia onns a la lunga tar la fatschenta, sco Implenia ha ditg sin dumonda.
Sindicats pretendan da desister da desditgas
Ils sindicats Syna ed Unia crititgeschan cleramain quest pass. Malgrà ch'ils carnets d'ordinaziuns sajan bain emplenids, sche betg schizunt enorm bain, valiteschia la direcziun dad Implenia Svizra la maximaziun dal gudogn pli aut ch'il mantegnair plazzas da lavur. Quai scrivan ils sindicats en ina communicaziun communabla.
Ils sindicats pretendan dad Implenia da desister da desditgas da plazzas da lavur. L'interpresa duaja valitar pli aut sia responsabladad envers ils collavuraturs che finamiras da rendita a curta vista. Ultra da quai pretendan ils sindicats da prolungar il termin da consultaziun enfin mez da zercladur.
