Sco emprim han tscherts bogns stuì avrir pli tard che planisà pervi dal coronavirus. Silsuenter n'è l'aura betg propi stada ideala il zercladur. Il fanadur èsi lura dentant marschà ti mordio. Quai è il tenor tar tut ils bogns averts dumandads (Bravuogn, Cuira, Glion, Scuol).
Fitg bunas cifras cunzunt en bogns pitschens
Cunzunt ils bogns in zichel pli pitschens da Bravuogn e Scuol pon mirar enavos sin ina fitg buna stad. A Bravuogn quinta il manader Tobias Baumann cun 50% dapli giasts ch'en la media dals davos 5 fin 6 onns. Era il responsabel per il bogn Vulpera a Scuol, Karlheinz Zegg, di ch'els hajan gì 20% dapli entradas che autras stads.
Bogns averts pli gronds han in zichel pli grev
L'entira sperdita chaschunada dal coronavirus na vegnian els betg dal tuttafatg a pudair cumpensar, di il manader dal bogn Obere Au a Cuira, Sandro Straub. Schegea ch'ins haja il fanadur gì 30% dapli giasts, per quai saja durant il zercladur simplamain stà memia schletta aura.
Aziz Cheikh, il manader dal bogn Fontanivas a Glion, ha fin ussa pudì notar 28'000 visitadras e visitaders. Ils ultims onns han els adina gì tranter 32'000 e 34'000 giasts. I saja dentant pussaivel dad anc cuntanscher quai dumber, cunquai ch'els han avert fin l'entschatta settember. E quai malgrà ch'els han pudì avrir il bogn pir in mais pli tard che planisà.
