La Regenza grischuna haja survegnì dumondas ord il sport, la cultura sco era vischnancas che veglian organisar radunanzas communalas cun dapli preschents. Quai ha ditg il minister da sanadad, Peter Peyer, sin dumonda. Tgeninas occurrenzas che vegnan lura lubidas na saja dentant anc betg cler. Per quai manchian er anc diversas directivas da la Confederaziun. Anc fin ils 10 da matg pon ils chantuns prender posiziun tar las propostas dal Cussegl federal per lubir pass per pass puspè occurenzas grondas.
Libertads per ils chantuns
Peter Peyer spera dentant che la Confederaziun laschia libertads als chantuns. Uschia pudess per exempel il chantun Basilea citad organisar ina occurrenza da ballape en ina furma pli gronda, fertant ch'il Grischun pudess lubir in festival da musica pli pitschen. Pia far bleras emprovas cun differentas circumstanzas ed er autras gruppas da particpants e participantas. E la finala pudessan ins profitar da las experientschas in da l'auter.
Sustegn per occurenzas che ston vegnir annulladas
En connex cun lubir pass per pass puspè occurrenzas pli grondas propona il Cussegl federal tranter auter er in sustegn finanzial per occurrenzas che stuessan puspè vegnir spustadas u annulladas. Cundiziun fiss dentant che l'occurrenza avess gì 1'000 aspectaturs ed ils organisaturs stuessan surpigliar 30'000 francs. Per il minister d'enconomia Marcus Caduff èn quai pulits obstachels. Perquai vesess el era ulteriur sustegn davart il chantun per occurenzas:
Decis na saja dentant anc nagut. Er la regenza grischuna stoppia pir anc elavurar sia posiziun. Il Cussegl federal decida lura probabel la fin matg definitivamain.