Siglir tar il cuntegn

Header

Chombra d'hotel vegn preparada per giasts.
Legenda: Chombra d'hotel vegn preparada per giasts. Keystone
cuntegn

Hotellaria Uschè paucas pernottaziuns sco anc mai

La hotellaria grischuna ha sentì ferm las consequenzas dal lockdown pervi dal coronavirus durant l'avrigl.

Cumpareglià cun l'avrigl 2019 è il dumber da las pernottaziuns sa reducì per 94,5% sin 9'565 pernottaziuns. Quai scriva l'Uffizi per economia e turissem dal Grischun. Sentì il pli ferm il regress ha cun 99,9% la regiun da Lai.

Ils mais da schaner e favrer 2020 han las destinaziuns grischunas anc beneventà sco usità giasts en lur hotels. Il mars - cun il lockdown en l'entira Svizra - èn las pernottaziuns gia sa reducidas. Era l'avrigl sa mussa questa tendenza - malgrà ch'ils hotels avessan dastgà laschar avert lur manaschis.

L'effect dal coronavirus è da vesair bain en l'illustraziun da las tschintg destinaziuns pli grondas dal Grischun.

Minus en l'entir Grischun

La reducziun dal dumber da pernottaziuns per il mais avrigl n'è nagut nov. En la survista dals davos 10 onns è visibel che las cifras crodan mintga avrigl. Il 2020 è quai dentant capità gia il mars e sut l'influenza da la pandemia en ina dimensiun pli extrema.

Medem maletg en l'entira Svizra

En l'entira Svizra è il dumber da pernottaziuns sa reducì per 92,4% sin passa 204'000 pernottaziuns l'avrigl. Insumma: Svizra Turissem na quinta betg da pudair egualisar questa perdita: Sur l'entir onn 2020 stoppia la branscha quintar cun perditas da 35% tar la svieuta, sco il schef Martin Nydegger ha ditg dacurt ad ina conferenza da pressa.

RTR novitads 09:00

Artitgels legids il pli savens

Scrollar a sanestra Scrollar a dretga