Siglir tar il cuntegn

Header

cuntegn

In fiduziari declera Las entradas mancan, ils custs fix van dentant vinavant

Ils restaurants restan anc serrads per almain tschintg ulteriuras emnas. Per ustieras ed ustiers mancan cun quai vinavant ina grnda part da las entradas. Ina part dals custs van dentant vinavant.

Ils custs d'ina ustaria pon ins parter en duas gruppas: Custs fix e custs variabels.

  • Custs variabels: Custs che dependan dal manaschi (per exempel mangiativas, bavrondas, u custs da persunal etc.). Ils custs variabels fan or enturn 70% da tut ils custs.
  • Custs fix: Custs ch'ina ustaria ha adina, er sch'ella è serrada (tschains da locaziun, ipotecas, custs per telefonia etc.). Ils custs variabels fan or enturn 30% dals custs totals.

Custs fix restan er durant il lockdown

Cun la decisiun da serrar las ustarias, han ils restaurants pers ina gronda part da lur entradas. Quai declera Urban Augustin, fiduziari e vicedirectur da la filiala a Cuira da la firma da cussegliaziun GastroConsult. Dentant er ils custs variabels èn per gronda part crudads davent. Lavur curta per il persunal surprenda il chantun. La patruna u il patrun pon dumandar per cumpensaziun dal gudgon (UCG, per tudestg «Erwerbsersatzordnung»).

Ils custs fix, pia var 30% (tut tenor manaschi), restan dentant. Quels ston ustieras ed ustiers pagar cun lur reservas. Tenor il fiduziari n'hajan gastronomas e gastronoms per il solit betg grondas reservas. Quai haja da far cun il manaschi. Per surviver a lunga vista datti surtut duas vias: chattar in model alternativ e far puspè dapli gudogn, u da sperrar sin agid dal stadi.

Pli bassas pretensiuns sco bun signal

Cun las novas mesiras ha il Cussegl federal er decis ulteriur agid finanzial. La regenza schlucca las cundiziuns ch'ina interpresa sto ademplir per survegnir daners sco cas da direzza. Tenor Urban Augustin saja quai in bun signal per la gastronomia. Bunamain tut ils restaurants valan numnadamain sco cas da dirrezza. La schanza da survegnir sustegn finanzial è pli gronda.

Tenor il fiduziari, che cusseglia surtut gastronomas e gastronoms, n'è il problem dentant betg giud maisa. I vegnia per exemepl a durrar fin ch'ils chantuns pajan propi or ils daners. Tenor Urban Augustin fissi impurtant, ch'ils restaurant pudassan puspè avrir.

RTR actualitad 08:00

Artitgels legids il pli savens

Scrollar a sanestra Scrollar a dretga