Siglir tar il cuntegn

Header

cuntegn

Luf: Rapport mensil 120 animals da niz stgarpads dal luf il 2020

Enfin uss èn radund 120 animals da chasa vegnids stgarpads quest onn dal luf en il chantun Grischun. En il decurs dal fanadur han lufs, ma er lufs-tscherver pudì vegnir observads en differentas regiuns dal Grischun.

Sco quai che l'Uffizi da chatscha e pestga dal Grischun scriva sin sia pagina d'internet, èn numerus animals da niz vegnids stgarpads da lufs il fanadur. Il pli ferm pertutgada da questa situaziun è la Surselva. En la segunda mesadad dal mais èn però er plirs animals da chasa vegnids stgarpads en il territori da Valragn.

Durant il mais da fanadur èn 19 cas cun animals da niz, stgarpads d'animals da rapina gronds vegnids annunziads a l'uffizi. Tut en tut èn 37 nursas vegnidas mazzadas, sis ulteriuras èn vegnidas blessadas. Bun la mesadad da las nursas eran protegidas cun ina saiv d'electricitad u cun chauns da protecziun. En tut ils cas han lufs stgarpà las nursas. Fin uss èn uschia radund 120 animals da niz vegnids stgarpads en il Grischun quest onn.

Differentas observaziuns

Sper ils cas cun animals da chasa stgarpads hai er dà il fanadur radund 60 indicaziuns directas u indirectas davart il luf. Uschia è la surveglianza da chatscha vegnida orientada davart observaziuns u ch'ins ha udì lufs sco er chattà fastizs u excrements da quels. Las bleras annunzias derivan da la Surselva. Singulas observaziuns hai er dà en las regiuns dal Surses, la Viamala, en il Partenz, il Landwassertal e l'Engiadina.

Sco gia communitgà, hai dà pitschens tar plirs trieps da lufs existents. Da quants ch'i sa tracta exactamain n'è però anc betg cler. Lufs-tscherver èn vegnids observads otg giadas il fanadur. Quai en Surselva, en l'Engiadina sco er en las regiuns Plaun e Viamala. Schacals mellens ed urs n'èn vegnids observads nagins il fanadur.

Quitads en plirs lieus

Dapi radund dus mais po in e scadin s'infurmar sin la pagina d'internet da l'Uffizi da chatscha e pestga davart ils eveniments actuals enturn il luf en il chantun. Là è er inditga sch'igl è stà in'observaziun, sch'ins ha chattà excrements u fastizs ubain sch'el ha stgarpà animals da chasa. Medemamain è er la data inditgada e pli cotschen ch'in punct è e pli actual ch'in eveniment è.

La charta mussa cleramain ch'i dat il mument intgins «hotspots» en connex cun il luf. Quai èn tranter auter:

  • la vart sanestra da la Val Medel en il conturn da Curaglia fin tar l'Alp Gannaretsch
  • Val Sumvitg fin en la Lumnezia e Val S. Pieder
  • territori sur Breil fin Falera
  • territori dal Parc Beverin

RTR novitads 06:00

Artitgels legids il pli savens

Scrollar a sanestra Scrollar a dretga