La crisa da corona chaschuna a la Viafier retica probabel ina perdita da bunamain 25 milliuns francs. Suenter trair giu l'agid finanzial da Covid-19, resta probabel anc in resultat negativ da radund 10 milliuns francs, communitgescha la Viafier retica.
Durant l'emprima unda èn las frequenzas sa reducidas per 80 fin 90%. Il zercladur è la situaziun sa restabilisada. Il fanadur e l'avust han las frequenzas cuntanschì radund 80% dal 2019. Uss, durant la segund'unda, sajan ellas dentant puspè giu sin 60% en il traffic turistic e sin 70% en il traffic da pendularis.
